ЖССТ раҳбари: Яқин кунларда коронавирусга чалинганлар сони бир миллиондан ошади

ЖССТ бош директори Тедрос Гебрейесус яқин вақт ичида дунёда коронавирусга чалинганлар сони бир миллиондан, вафот этганлар сони 50 мингдан ошишини айтди.

Тедрос Гебрейесус / Фото: Reuters

“Мен инфекциянинг дунё бўйлаб тез тарқалишидан ташвишдаман. Охирги 5 ҳафта ичида биз деярли ҳар бир давлат ва ҳудудда қайд қилинган янги касалланиш ҳолатлари деярли экспоненциал равишда ўсаётганини кўрмоқдамиз. Охирги ҳафтада ўлимлар сони 2 мартадан кўпроққа ошди. Яқин кунларда коронавирусга чалинганлар сони бир миллионга, ундан вафот этганлар сони 50 мингга етади”, деб айтган Гебрейесус матбуот анжуманида.

ЖССТ маълумотларига кўра, дунё бўйлаб коронавирусга чалинганлар сони 750 мингдан, вафот этганлар сони 36 мингдан кўпроқни ташкил қилмоқда. Жонс Ҳопкинс университети реал вақтда эълон қиладиган маълумотларга кўра эса дунёда коронавирусга чалинганлар сони 924 мингдан ошган, у келтириб чиқарган асоратлардан 46 мингдан кўпроқ одам вафот этган.

Тайёрлаган Шуҳрат Раҳимов

#ЖССТ #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.