Путин Россияда карантин қоидаларини бузганлик учун жиноий жавобгарлик ҳақидаги қонунни имзолади

Россия президенти Владимир Путин коронавирус пандемияси шароитида махсус чораларни бузганлик учун жиноий жавобгарликни назарда тутувчи қонунни имзолади. Қонун ҳуқуқий ахборот расмий порталида эълон қилинган.

Оммавий зарарланишга сабаб бўлган санитария-эпидемиология қоидаларини бузиш ёки унинг учун эҳтимолли шароитлар яратиш икки йилгача озодликдан маҳрум қилиш, озодликни чеклаш, мажбурий ахлоқ тузатиш ишлари ёки 500 мингдан 700 минг рублгача жарима билан жазоланиши мумкин.

Карантинни ўзбошимчалик билан бузиш бир кишининг ўлимига сабаб бўлса, уч йилдан 5 йилгача озодликдан маҳрум этиш ёки 1 миллиондан 2 миллион рублгача жарима билан жазоланади.

Санитария-эпидемология қоидаларини назар-писанд этмаслиги оқибатида икки ва ундан ортиқ инсонларнинг ўлимига сабабчи бўлган қоидабузарлар 5-7 йил озодликдан маҳрум этилиши ёки 4-5 йил муддатга мажбурий меҳнат билан жазоланиши мумкин.

Путин шунингдек, коронавирус тўғрисида ҳақиқатга тўғри келмайдиган маълумотларни тарқатганлик учун ҳам жазо чораларини маъқуллади. Саломатликка зиён етказувчи бундай ахборотни эълон қилиш 700 мингдан 1 миллион рублгача жарима ёки 3 йилгача озодликдан маҳрум қилиш билан жазоланади.

Агар ёлғон маълумотларни тарқатиш инсон ўлимига ёки оғир оқибатларга сабаб бўлса, у 1,5–2 миллион рубль жаримага ёки 5 йилгача бўлган муддатга озодликдан маҳрум қилиш билан жазоланади.

Аввалроқ Путин карантинга риоя этмаслик ва ҳақиқатга тўғри келмайдиган маълумотларни тарқатганлик учун маъмурий жавобгарлик тўғрисидаги қонунни имзолаган.

РФ Маъмурий жавобгарлик тўғрисидаги кодексига киритилаётган ўзгаришлар касалликнинг тарқалиш таҳдидига олиб келган санитария-эпидемиология чораларини бузганлик учун жорий этилган.

Фуқаролар учун жарима миқдори 15 минг рублдан 40 минг рублгача; мансабдор шахслар учун 50 минг рублдан 150 минг рублгача ёки фаолиятни уч ойгача тўхтатиб қўйиш билан жазоланади. Ташкилотлар учун максимал санкция — 500 минг рубль.

Эслатиб ўтамиз, Ўзбекистон президенти Шавкат Мирзиёев 26 март куни Ўзбекистоннинг Жиноят, Жиноят-процессуал кодексларига ҳамда Маъмурий жавобгарлик тўғрисидаги кодексига ўзгартиш ва қўшимчалар киритиш ҳақидаги қонунни имзолаган эди.