Интернетда коронавирусга чалинганлар учун «учар госпитал» суратлари эълон қилинди

Инсайдерлар интернетда коронавирусга чалинганларни Италиядан Германияга етказувчи самолёт қандай кўринишини намойиш қилишди. «Учар госпитал»нинг суратлари The Sun нашри томонидан эълон қилинган.

Фото: Twitter/akk

Маълум қилинишича, ушбу самолёт-госпитал Airbus A310 MRT MedEvac самолёти негизида яратилган. Самолёт энг зарур замонавий қурилмалар билан жиҳозланган бўлиб, унда беморлар учун 44 та койка бор, жонлантириш бўлими бир вақтда 16 кишини сиғдира олади.

Самолёт энг замонавий тиббий технологиялар: компьютерлар ва ташхислаш учун тизимлар, кислород бериш қурилмалари ва автоматик инъекциялар билан таъминланган. Шифокорлар самолёт бортида бронхоскоплар ва дефибрилляторлар қўллай оладилар.

Самолёт экипажи 25 кишидан ташкил топади. Улар орасида тиббий ходимлар бўлиб, улар жарроҳлик аралашувидан бошқа барча стандарт муолажаларни бажара оладилар. Германиялик ҳарбийларнинг таъкидлашича, самолётни парвозга 3 соатда тайёрлаш мумкин. Зарурат бўлса, уни 30 тонна юк сиғадиган қилиб қайта жиҳозлаш мумкин.

Ҳозирда Германияда коронавирусга чалинган италянлар ва французлар даволанмоқда.

#самолёт #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.