Буюк Британияда 5G миноралари коронавирус тарқатиши тўғрисидаги хабарлардан сўнг минораларга ўт қўйилди

3 апрель куни Ливерпул, Бирмингҳем ва Меллинг шаҳарларида яшовчилар 5G алоқаси коронавирус тарқатиши тўғрисидаги миш-мишлардан сўнг уяли алоқа минораларига ўт қўйиб юборишди. 

Vodafone ва EE операторларининг The Verge нашрига маълум қилишича, 3 апрел кунги ўт қўйишлардан тўртта минора шикастланган, эртасига яна тўртта минорага ҳужум қилинган. Бирмингҳемдаги минора 5G сигнал тарқатмасди, аммо унга ҳам ўт қўйишган, деб маълум қилди EE.

Қайд этилишича, бу минора минглаб кишиларни 2G, 3G ва 4G-алоқаси билан таъминлаб келган. Компания имкон қадар тезроқ алоқани тиклашга ваъда берди.

Full Fact фактчекинг ташкилоти ўт қўйишларни иккита кенг тарқалган назария билан боғламоқда. Бу назариялар Фейсбукдаги турли гуруҳлар, WhatsApp ва YouTube’да март ойида тарқалган.

Назариялардан бирига кўра, 5G инсон иммун тизимини заифлаштирувчи нур тарқатади ва одамлар коронавирусга чалинувчан бўлиб қолади. Ушбу ғоя тарафдорларининг фикрича, вируснинг Уҳанда пайдо бўлиши бу шаҳарда 5G тармоғи ишга тушиши билан боғлиқ. Шундан сўнг инфекция янги авлод тармоғи ишга туширилган бошқа шаҳарларга тарқала бошлаган.

Иккинчи назария тарафдорлари эса вирус тарқалиш учун 5G-тармоқлари радиотўлқинларидан фойдаланишини таъкидлашмоқда. Бу фикрга 2011 йилда бактериялар радиотўлқин ҳосил қилиши мумкинлигини тахмин қилган олим, Нобель мукофоти лауреати Люка Монтагьенинг тадқиқотларини асос қилиб олишган.

Full Fact қайд этишича, ҳар икки назария илмий жиҳатдан асосланмаган. Бундан ташқари, назария тарафдорлари коронавирус 5G умуман мавжуд бўлмаган мамлакат ва шаҳарларга ҳам тарқалганини ҳисобга олишмаган.