Бразилияда карантин чоралари жорий этишни талаб қилган соғлиқни сақлаш вазири ишдан бўшатилди

Бразилия президенти иқтисодиётга зарба бериши ва ишсизликнинг ўсиб кетишини таъкидлаб, чеклов чораларига қарши чиққанди.

Луис Мандетта / Фото: Adriano Machado / Reuters / Scanpix / LETA

Бразилия президенти Жаир Болсонару соғлиқни сақлаш вазири Луис Мандеттани мамлакатда коронавирусга қарши кураш борасидаги ёндашувлари турлича бўлгани учун истеъфога чиқарди.

Болсонару коронавируснинг хавфлилиги бўрттириб юборилган деб ҳисоблайди. Аввалроқ Бразилия президенти эпидемияни «кичикроқ грипп» деб атаган ва штатлар губернаторларини чеклов чоралари киритгани учун танқид қилганди.

Мандетта эса бошқача фикрда эди —Бразилия соғлиқни сақлаш вазирлиги ижтимоий мулоқотларни максимал даражада чеклашни тавсия қилаётганди. Болсонару ўз навбатида бундай чоралар иқтисодиётга зарба бериши ва ишсизликнинг ўсиб кетишини таъкидлаганди.

Болсонару Мандеттанинг ўрнига онколог Нелсон Таишни соғлиқни сақлаш вазири этиб тайинлади.

Бразилияда коронавирусга чалиниш билан боғлиқ 31 мингта ҳолат қайд этилган, икки мингга яқин киши вафот этган.

Тайёрлаган Дилшод Аскаров

#Бразилия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.