Махсус комиссия ҳамюртларимизни хориждан олиб келиш учун чартер рейслар ташкил этиш тўғрисида алоҳида қарор қабул қилади - ТИВ

Ташқи ишлар вазирлиги чет элда бўлиб турган Ўзбекистон фуқаролари ва мамлакатдаги хорижий фуқароларга мурожаат билан чиқди

Фото: Соғлиқни сақлаш вазирлиги ахборот хизмати

Республика махсус комиссияси ҳамюртларимизни хориждан олиб келиш учун чартер рейсларини ташкил этиш тўғрисида алоҳида қарор қабул қилади. Бу ҳақда Ташқи ишлар вазирлиги хабар бермоқда.

Қайд этилишича, Республика махсус комиссияси коронавирус инфекцияси кенг тарқалишининг олдини олишга қаратилган барча чекловчи чораларни 2020 йил 10 майга қадар узайтириш тўғрисида қарор қабул қилди.

Шунингдек, хорижий фуқароларга берилган виза муддатлари жорий йил 1 июнга қадар автоматик узайтирилади, муайян муддатга визасиз кириш ҳуқуқига эга бўлган давлатлар фуқароларига (агар белгиланган муддат бузилган тақдирда) истисно тариқасида мамлакатдан чиқиб кетишига жорий йилнинг 1 июнига қадар рухсат берилади, уларга нисбатан жавобгарлик чоралари қўлланилмайди.

“Шу билан бирга, Республика махсус комиссияси ҳамюртларимизни хориждан олиб келиш учун чартер рейсларини ташкил этиш тўғрисида алоҳида қарор қабул қилишини эслатамиз.

Махсус комиссиянинг ушбу қарори, шунингдек, чартер рейсларининг санаси ва йўналишлари тўғрисидаги маълумот расмий интернет-манбалар орқали қўшимча равишда тарқатилади”, - дейилади хабарда.