Индонезияда ҳаво ва денгиз орқали ташувлар тўхтатилди

Индонезия ҳукумати коронавирус тарқалиши хавфи туфайли ички ва халқаро ҳаво ҳамда денгиз орқали йўловчи ташилишини тўхтатади. Бу ҳақда мамлакат транспорт вазирлиги бош директори Нови Риянтонинг баёнотида айтилди.

Унинг сўзларига кўра, "чекловлар 24 апрелдан кучга киради ва 1 июнгача давом этади". Қайд этилишича, "тақиқ пандемия атрофидаги вазиятнинг ривожланишидан келиб чиқиб узайтирилиши мумкин".  

Ушбу ҳафтада Индонезия президенти Жоко Видодо маҳаллий аҳолига мамлакат бўйлаб саёҳатга чиқишни тақиқлаганди.

Охирги маълумотларга кўра, мамлакатда коронавирус юқтирганлар сони 7,7 мингдан ошди. Индонезия университети олимлари агарда ҳукумат карантин чораларини кучайтирмаса, яқин ой ичида бу рақам 1, 5 миллионга етиши, 140 мингга яқин инсон вафот этиши мумкинлиги тўғрисида огоҳлантирмоқда.