Германияда мактабларни очиш ва спорт мусобақалари ўтказишга рухсат берилмоқда

Германия ҳукумати мактабларни очиш ва спорт мусобақалари ўтказишга рухсат беришга қарор қилди. Бу ҳақда мамлакат федерал канцлери Ангела Меркель маълум қилди.

Фото: AP

"Биз шартларга риоя қилинган ҳолатда спорт майдончалари ва музей, кўргазма заллари, галереялар, мемориаллар, ҳайвонот ва экология боғларини очишга келишиб олдик", — деди у.

Меркель бу объектлар қачон ва қандай тартибда очилишини федерал ерлар ҳал қилишини қўшимча қилди. Бу масала 6 май куни муҳокама қилинади.

Мактаблар, университетлар ва бошқа ўқув муассасалари 16 мартда ёпилганди. 23 мартдан ноозиқ-овқат дўконлари, маданият ва спорт муассасалари, қаҳвахона ва ресторанлар, гўзаллик салонлари ва сартарошхоналар ёпилди.

Кейинги кунларда чеклов чоралари юмшатила бошланди. Майдони 800 квадрат метргача бўлган дўконлар, автомобиль ва велосипед салонлари, китоб дўконлари очилди. 4 майдан мактаблар ва сартарошхоналар очилади.

Тайёрлаган Дилшод Аскаров

#Германия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.