Бухородаги шамолдан зарар кўрган 20 фоиз хонадонларнинг томи ёпилди

Бу ҳақда президент Шавкат Мирзиёев 5 май кунги йиғилишда маълум қилди.

«Бу йил инсоният учун, шу жумладан биз учун жуда оғир келди. Кейинги бир ҳафтанинг ўзида халқимиз кетма-кет кутилмаган синовларга дуч келди.

27 апрель кечаси Бухоро вилоятида, айниқса, Олот ва Қоракўл туманларида юз берган оғир табиий офатдан яхши хабардорсизлар.

Бу офат вилоят бўйича 38 мингдан зиёд аҳоли хонадонлари, 847 та ижтимоий соҳа объектларига, экин майдонларига зарар етказди. Қишлоқ хўжалиги, ишлаб чиқариш, хизмат кўрсатиш ва инфратузилма соҳаларига ҳам жиддий талафот етди.

Биз табиий офат оқибатларини бартараф қилиш бўйича барча зарур чораларни кўряпмиз. Ҳукумат комиссияси тун-у кун ишламоқда.

Бугунгача 70 фоиз ижтимоий объектлар, 20 фоиз аҳоли хонадонларининг томи ёпилди. Шунингдек, 5 минг километр электр тармоқлари, 1 минг 100 та трансформатор таъмирланиб, 286 минг аҳолининг электр таъминоти тикланди. Якка тартибдаги уй-жойлар ҳам таъмирланмоқда», – деди давлат раҳбари.

Эслатиб ўтамиз, ушбу табиий офат оқибатларини бартараф этиш учун президент фармойиши билан 100 млрд сўм ажратилган эди.

Кучли шамол оқибатида бир киши вафот этди, 41 киши жароҳат олди.