Душанбеда қурилаётган кўп қаватли уйлар коронавирусга чалинган беморлар учун шифохоналарга мослаштирилади

Душанбе шаҳри раиси, Тожикистон президентининг ўғли Рустам Эмомали шаҳарда қурилаётган кўп қаватли уйларни коронавирусга чалинган беморлар учун шифохоналарга мослаштиришга буйруқ берди.

У куни кеча ташриф буюрган майдони 14,2 минг квадрат метрни ташкил этувчи олти қаватли уйда уч кун ичида 110та даволаш кабинети ва 24та иш кабинети жойлаштирилади. Шифохона 600 нафаргача беморни қабул қилади.

Рустам Эмомали шунингдек, бир ой ичида фойдаланишга топширилиши мўлжалланган саккиз қаватли уйдаги ишларнинг бориши билан танишди. Умумий майдони 10,3 квадрат метр бўлган мазкур бинода 200та ўринга мўлжалланган шифохона жойлаштирилиши режалаштирилмоқда.

Охирги маълумотларга кўра, Тожикистонда коронавирусга чалинганлар сони 300га яқинлашган, 5 киши вафот этган.

4 май куни Тожикистонда биратўла 102 кишига коронавирусдан зарарланиш ташхиси қўйилганди.

5 май куни Тожикистон соғлиқни сақлаш ва ижтимоий муҳофаза вазири Насим Олимзода Хўжа ўз лавозимидан озод этилгани хабар қилинди.