Имомали Раҳмон коронавирусга чалиниб Германияга кетгани ҳақидаги хабар рад этилди

Аввалроқ Тожикистон президенти ҳақида турли миш-мишлар тарқалганди. Уларнинг баъзиларида Имомали Раҳмон гўёки Душанбеда вирус аниқлангач, ота юрти Данғарага (Тожикистондаги Данғара тумани) кетгани айтилган бўлса, президент даволаниш учун Германияга йўл олгани ҳақида ҳам хабарлар тарқалди.

Абдужаббор Раҳмонзоданинг айтишича, «миллатга ёмонлик тиловчи» одамлар, хусусан мухолифат вакили Шарофиддин Гадоев миллат етакчиси атрофида бирлашиш ўрнига хориждан туриб иғво тарқатишмоқда. 

3 май куни Тожикистонга Phonex Air авиакомпаниясига тегишли Gulfsrteam G-III самолёти келган ва мухолифат вакили бу самолёт гўёки Имомали Раҳмонни олиб кетиш учун юборилганини ёзган. Аммо Абдужаббор Раҳмонзоданинг айтишича, бу самолёт Германиядан Тожикистонга гуманитар ёрдам олиб келган.

«Тожикистон хавфсизлик хизматидаги манбага кўра, Имомали Раҳмон коронавирусга чалинган ва даволаниш учун 3 май куни соат 22:24да Gulfstream G-III самолётида Германияга учиб кетган. Самолёт махсус тиббий ускуналар билан жиҳозланган бўлган.

Раҳмон узоқ вақтдан буён омма олдида кўриниш бермаётганига қараганда бу гаплар ҳақиқатга ўхшайди. Давлат раҳбари одамлар олдига чиқиб вазиятни одамларга тушунтириш ўрнига яширинишда давом этмоқда.

Манбанинг айтишича, 30 апрелдаги коронавируснинг олдини олиш бўйича ўтказилган йиғилиш ҳам сохталаштирилган ва аслида Раҳмон унда қатнашмаган. Бу сохтакорлик одамларни Имомали Раҳмон ҳаммасини ўз назоратига олганига ишонтириш учун қилинган. Имомали Раҳмоннинг 23 апрелдаги Рамазон билан табриклаш нутқида юзи кўкимтир тусда бўлган ва унинг саломатлиги яхши бўлмагани кўринган.

Имомали Раҳмон Тожикистонда коронавирус аниқланганини камида 1,5 ой яширган. Тақдирни қарангки, касаллик унинг ўзини ҳам қамраб олди. Тожикистонликлар касалхоналарда тиббий воситалар етишмовчилигидан қийналаётган бир вақтда президентни қутқариш учун қимматбаҳо самолётлар чақиртирилмоқда.

Президентликни ўғли Рустам Имомалига топшириш ҳақида ўйлаётган Имомали Раҳмон эпидемиологик вазият жиддийлигини узоқ вақт рад этиб келди ва хурсандчилик қилишда, рақс тушишда давом этди. Айнан унинг айби билан мамлакат бугун коронавирусга қарши курашиш учун тайёр эмас», деган Шарофиддин Гадоев фейсбукдаги саҳифасида.

Абдужаббор Раҳмонзодага кўра, Имомали Раҳмон барчасини назорат қилиб, маҳаллий раҳбарларга телефон орқали кўрсатмалар беришда давом этмоқда.

Тожикистонда коронавирус кириб келгани илк марта 29 апрель куни эълон қилинганди.

6 май куни Тожикистонда яна 86 кишида коронавирус аниқланди жами зарарланиш ҳолатлари сони 379тага етди. Бугун яна 3 бемор вафоти тасдиқланди ва жами қурбонлар сони 8 нафарга етди.