Жанубий Кореядан Ўзбекистонга инсонпарварлик кўмагининг иккинчи партияси жўнатилди

Ўзбекистон Республикаси Президенти Шавкат Мирзиёевнинг жорий йил 13 апрель куни Корея Республикаси Президенти Мун Чжэ Ин билан телефон орқали мулоқоти чоғида эришилган келишув доирасида ташкил этилган мазкур кўмакнинг 6,2 тонналик биринчи қисми Ўзбекистонга 26 апрель куни олиб келинган эди.

«Дунё» ахборот агентлигининг хабар беришича, 10 май куни умумий қиймати 192 минг долларга яқин тиббий воситалар шаклидаги навбатдаги инсонпарварлик юки ортилган «Uzbekistan Airways» компаниясининг махсус самолёти Сеулдан Тошкентга йўл олган.

Қимматли юк таркибига автоматик бошқариладиган кўп функцияли тиббий каравот, антисептик ва дезинфекция воситалари, тиббий ниқоблар, инсон иммун тизимини мустаҳкамлашга хизмат қиладиган озуқавий қўшимчалар киритилган.

Инсонпарварлик ёрдами Жанубий Кореянинг «BOMI Engineering», «LH Corporation», «Evergreen Motors», «Infinity Co., Ltd.» компаниялари, Шинхан университети ҳамда ушбу мамлакатда вақтинча меҳнат фаолиятини олиб бораётган ватандошлар ва ўзбекистонлик талабалар томонидан тақдим этилди.