Сирдарёда мингга яқин кўнгилли ёшлар хизмат қилмоқда – Алишер Саъдуллаев

Сирдарёда ўтказилган Халқаро пресс-клуб сессиясида қатнашган Ёшлар иттифоқи раиси Алишер Саъдуллаев Сардоба техноген офати оқибатларини бартараф этишда иштирок этаётган кўнгилли ёшлар фаолияти ҳақида ахборот берди.

Алишер Саъдуллаев Фото: Uzreport TV

Унинг сўзларига кўра, Сирдарё вилояти бўйича мингга яқин волонтёр ишламоқда. Уларнинг фаолияти учта йўналишда ташкил этилган. Биринчидан, бутун Ўзбекистондан келаётган хайрияларни қабул қилиб, тартиб билан жойлаштиришмоқда. Иккинчидан, эвакуация қилинган жойлардаги кексалар, ёш оилаларнинг фарзандлари олдида бўлиб, уларни қўллаб-қувватлашмоқда, хизматларини қилишмоқда. Учинчи йўналишда “Фидокор ёшлар отрядлари” ташкил этилган бўлиб, улар қурилиш объектларидаги иш жараёнларига жалб қилинган.

“Бу - ёшларнинг жараёнга бефарқ эмаслиги, шу вазиятда ўз ўрнини кўрсатишни истагани, халқимиз бошига келган синовли кунларда бир четда туриб эмас, жараён марказида иштирок этишни хоҳлашининг яққол мисоли, деб ўйлайман”, деди Алишер Саъдуллаев.