Россияда коронавирусдан биринчи дори қўллаш учун маъқулланди. У июндан шифохоналарга тарқатилади

Россияда коронавирусга қарши ишлаб чиқилган биринчи дори - “Авифавир” Россия соғлиқни сақлаш вазирлиги томонидан маъқулланди. У 11 июндан Россия шифохоналарига тарқатилади.

Фото: ИЗВЕСТИЯ/Павел Бедняков

Ушбу дори воситаси Россиянинг тўғридан-тўғри ивестициялар жамғармаси ва “ХимРар” компаниялари гуруҳи томонидан Япониянинг “Фавипиравир” дориси негизида ишлаб чиқилган.

Бироқ “Авифавир”нинг тадқиқотлари ёз охиригача давом этади. У шифохоналарга шартномалар бўйича тарқатилади ва эркин савдога чиқарилмайди.

Мутахассисларнинг таъкидлашича, Россияда ҳозиргача коронавирусни даволаш учун махсус дорилар йўқ эди. Асосан иммун тизими жавобини чақирувчи дорилар, мисол учун безгак ёки артритга қарши қўлланувчи гидроксихлорохиннинг аминохинолин ҳосилаларидан фойдаланилган.

“Фавипиравир” эса айнан РНК-сақловчи вируслар чақирувчи юқумли касалликларни даволаш учун ишлаб чиқилган. У грипп вируслари, жумладан парранда гриппига қарши самарали эканини кўрсатган. Дори вируслар тарқалишини блоклайди.

Таъкидланишича, “Авифавир”нинг коронавирусга қарши самарадорлиги 80 фоиздан кўпроқни ташкил қилади, бироқ Японияда “Фавипиравир”нинг самарадорлигини исботлай олмай, унинг қўлланиши қолдирилган.

Тайёрлаган Шуҳрат Раҳимов

#Россия #коронавирус #Авифавир

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.