Хитойдаги мактабга ҳужум оқибатида 40дан ортиқ ўқувчи жароҳатланди

Хитой жанубидаги Гуанси-Чжуан автоном районида жойлашган бошланғич мактабда 40дан ортиқ ўқувчилар ва мактаб ходимлари пичоқ билан қилинган ҳужум натижасида жароҳат олди.

Хабар қилинишича, ҳужум Учжоу шаҳри яқинидаги Ванфу қишлоғидаги мактабда амалга оширилган.

Мактаб қоровули бўлиб ишлайдиган 50 ёшли эркак кутилмаганда қўлига пичоқ олиб болалар ва катталарга ташланган.  

Жароҳатланганларнинг аксарияти олти ёшгача бўлган болалар эканлиги айтилмоқда. Бир ўқувчи, мактаб директори ва бошқа қоровул жиддий жароҳатланган. Ҳужум қилган шахс ҳибсга олинган, унинг нима учун бундай қилганлиги ҳозирча аниқланмаган.

ОАВнинг ёзишича, бу Хитойдаги мактабда юз берган биринчи ҳолат эмас. Шунинг учун Хитойдаги мактаблар қўриқланади.