Саудия Арабистонида 21 июндан комендантлик соати бекор қилинади

Саудия Арабистони ички ишлар вазирлиги 23 мартда коронавирус пандемияси сабабли жорий этилган комендантлик соати бекор бўлишини маълум қилди. Бу ҳақда Al Hadath телеканали хабар бермоқда.

"21 июнь эрталаб соат 6.00дан дан мамлакатнинг барча ҳудудларида комендантлик соати амал қилиши тўхтатилади", - дейилади ички ишлар вазирлиги баёнотида.

Баёнотда айтилишича, қиролликда санитар-эпидемиологик чораларга қатъий амал қилиниши лозим бўлади. Ҳукумат фуқароларни "ижтимоий масофа сақлаш, оғиз ва бурунни ёпиб турадиган ниқоб тақиш ҳамда 50дан ортиқ киши тўпланадиган йиғилишлар ўтказмаслик"ка чақирмоқда. Қайд этилишича, ушбу тартибга амал қилмаганлар жазога тортилади.

Саудия ҳукумати иқтисодий ва савдо фаолиятига нисбатан жорий этилган барча чекловларни олиб ташламоқда. 21 июндан давлат муассасалари ва хусусий компанияларга иш бошлашга рухсат берилди.

Шу билан бирга, қиролликнинг денгиз ва қуруқлик чегаралари ёпиқлигича қолади, хориж давлатлари билан авиақатновларни тиклаш бўйича ҳозирча қарор қабул қилинмаган. 

Қироллик соғлиқни сақлаш вазирлигининг маълумот беришича, Саудия Арабистонида бир суткада коронавирус юқтириш билан боғлиқ 4757 та ҳолат қайд этилган, жами касаллик юқтирганлар сони 145 991 нафарга етган, 1 139 киши касалликдан вафот этган.