Зеленский суд қароридан қатъи назар карантинни бузгани учун жарима суммасини тўлашга ваъда берди

Украина президенти Владимир Зеленский унга нисбатан чиқариладиган суд қароридан қатъи назар, 3 июнда Хмельницкийдаги кафеда карантин режимини бузгани учун тайинланган жаримага тенг суммани кафега тўлаб беришга ва маъмурий қоидабузурлик ҳақида қарор чиқарилса, уни ўташга ваъда берди. 

Зеленскийнинг айтишича, у украиналик сифатида карантинни бузгани учун жавобгарликни ҳис қилади. “Кафе ҳисобига жарима суммасига тенг суммани ихтиёрий тарзда ўтказиб бераман. Шу билан бирга суд томонидан мени маъмурий жавобгарликка тортиш ҳақида қарор чиқарилса, уни Украина қонунида кўзда тутилган тарзда ўтайман”, деб айтган Украина президенти.

Зеленский кафе ичкарисида ҳамроҳлари билан бирга қаҳва ичган, ваҳоланки карантин туфайли ташриф буюрувчиларни кафенинг ёзги майдонларидагина жойлаштиришга рухсат берилган бўлган.

Шундан кейин полициячилар Зеленскийга ва унга ҳамроҳлик қилган кишиларга маъмурий баённома тузишган. Ўшанда президент билан бирга бўлган бош санитар врач Виктор Ляшко улар Хмельницкийда кафенинг ичкариси очилишга тайёрлигини текширишмоқчи бўлишгани айтган. 

19 июнда суд Зеленский билан кафеда бирга бўлган барчани карантин қоидаларини бузганлик учун жаримага тортгани маълум бўлган. Жумладан, президент офиси раҳбари Андрей Ермак, унинг биринчи ўринбосари Сергей Трофимов, бош санитар врач Виктор Ляшко, Хмельницкий области раҳбари Дмитрий Габинет, Хмельницкий шаҳри мэри Александр Симчишин ва хусусий тадбиркор Андрей Мельниченко 17 минг гривнадан (640 доллар) жаримага тортилган.

Шу билан бирга суд Зеленскийга нисбатан ишни конституциянинг президент дахлсизлиги ҳақидаги нормаси расман талқин қилингунгача тўхтатиб туришга қарор қилган.