Пахта-тўқимачилик кластерлари уюшмага бирлаштирилади

Ҳужжат билан Ўзбекистон пахта-тўқимачилик кластерлари уюшмаси ташкил этилади.

Norma’нинг ёзишича, унинг вазифалари қуйидагилардан иборат:

кластерлар фаолиятида юзага келадиган тизимли муаммоларни ҳал этиш;

давлат бошқаруви органларида пахта-тўқимачилик кластерлари манфаатлари ва ҳуқуқларини ҳимоя қилиш;

юқори қўшилган қийматга эга маҳсулотни экспорт қилиш ҳажмини кенгайтириш;

хом ашё базаси, кластерлар инфратузилмасини комплекс ривожлантириш;

кластерлар ва фермер хўжаликлари ўртасидаги муносабатларни тартибга солиш.
 
Уюшма тузилмасида тармоқни ривожлантиришнинг истиқболли ва устувор йўналишларини белгилайдиган Пахта-тўқимачилик кластерлари кенгашини ташкил этиш назарда тутилган. Муассисларнинг умумий йиғилиши қарори билан уюшманинг ижро аппарати тузилмаси тасдиқланади ҳамда унинг раиси ва ўринбосарлари сайланади.
 
Уюшма фаолиятини молиялаштириш аъзолик бадаллари ва қонун ҳужжатларида тақиқланмаган бошқа манбалар ҳисобига амалга оширилади. Уюшма Тошкент шаҳар, Яккасарой тумани, Шота Руставелли кўчаси, 8-уй манзилидаги «Пахтасаноат илмий маркази» АЖ биносида жойлаштирилади.
 
Қишлоқ хўжалигига мўлжалланган ерлардан самарали фойдаланиш, пахта-тўқимачилик кластерлари ва фермер хўжаликлари ўртасида ўзаро муносабатларни такомиллаштириш мақсадида кластерлар фаолиятини баҳолаш тизими жорий этилади. Баҳолаш ижоралараро комиссия ва ҳудудий ишчи гуруҳлар томонидан ҳар йили 25 декабрга қадар ўтказилади.
 
Қарор билан қуйидагилар тасдиқланди:

Пахта-тўқимачилик кластерлари фаолиятини баҳолаш тартиби тўғрисидаги низом;

Пахта-тўқимачилик кластерлари фаолиятини баҳолаш бўйича идоралараро комиссия таркиби;

Пахта-тўқимачилик кластерлари фаолиятини баҳолаш бўйича ҳудудий ишчи гуруҳнинг намунавий таркиби.
 
Кластерлар фаолияти балли тизим асосида қуйидаги йўналишлар бўйича баҳоланади:

пахта хом ашёсини етиштиришдан бошлаб уни тайёр маҳсулот сифатида сотишгача бўлган ишлаб чиқаришнинг узлуксиз узлуксиз занжирини ташкил этиш даражаси (умумий кўрсаткичнинг 50 фоизи);

ер ва сув ресурсларидан самарали фойдаланиш, янги ва замонавий техника ва технологияларни қўллаш даражаси (30 фоиз);

фермерларнинг манфаатдорлигини ҳисобга олиш даражаси (10 фоиз);

пахта-тўқимачилик кластерлари фаолияти самарадорлиги билан боғлиқ бошқа масалалар (10 фоиз).
 
Идоралараро комиссия кластерлар фаолиятини баҳолаш ва таҳлил қилиш натижаларига кўра, кластернинг фаолияти самара бермаётганлиги тўғрисида қарор чиқариши ҳамда тегишли ҳудудда кластер ташкил этиш учун янги муассисларни тавсия этиши мумкин.
 
Ҳужжат 23.06.2020 йилдан кучга кирди.