Эфиопияда машҳур қўшиқчи ўлимидан кейин юз берган тартибсизликларда 81 киши ҳалок бўлди

Эфиопияда машҳур қўшиқчи ва сиёсий фаол Хаакаалуу Хундессаа ўлдирилгандан кейин авж олган тартибсизликлар давомида охирги 48 соат ичида 81 киши ҳалок бўлди. 

Пойтахт Аддис-Абебеда 1 июлда армия кучлари жойлаштирилган. Маълум қилинишича, шаҳар чеккаларида қуролланган тўдалар пайдо бўлиб, талончилик билан шуғулланмоқда. Эфиопиянинг Addis Standard нашри маълумотларига кўра, 1 июлда Аддис-Абебеда “Балдерас ҳақиқий демократия учун” сиёсий партияси етакчиси Эскиндер Негу ҳибсга олинган.

36 ёшли қўшиқчи ўлдирилгани маълум бўлгандан кейин 30 июнь эрталабдан қўшиқчи келиб чиққан Оромия штати шаҳарлари ва Аддис-Абебеда ёшлар тўплана бошлаган. Улар покришкаларни ёқиб, ҳукуматга қарши шиорлар айта бошлашган. Бир қатор жойларда полиция билан тўқнашувлар ва тартибсизликлар юз берган. Пойтахтда ва Оромия штатининг баъзи шаҳарларида интернет ўчириб қўйилган, Эфиопиянинг кўплаб ахборот порталларига ҳали ҳам кириб бўлмаяпти.

Эфиопиянинг энг кўп сонли оромо элатига мансуб бўлган қўшиқчи Хаакаалуу Хундессаа ўзининг сиёсий фаолияти учун панжара ортига тушгандан кейин кенг таниқликка эришган. Кейинроқ у ҳукуматга қарши намойишларда иштирок этган. Шу билан бир вақтда у қўшиқчи сифатида танила борган. Қўшиқчи 29 июнь кечки вақт Аддис-Абебе даҳаларидан бирида отиб кетилган. Полиция унинг ўлимида гумон қилинган бир неча кишини қўлга олган. 

Қўшиқчининг дафн маросими 2 июлда унинг она шаҳри Амбода бўлиб ўтади.