Абдусамад Дўрмонов: «Нефтчи» хоҳлаган келиб кетадиган жамоага айланиб қолганди»

#FootWeek ўзбек клубларининг ҳолати билан танишишда давом этади. Бу гал ижодий жамоамиз Фарғонада «Нефтчи» клуби меҳмони бўлди. Жамоанинг ўтмишдаги юлдузларидан бири ва ҳозирда бош мураббийи бўлган Абдусамад Дўрмонов билан фарғоналик мухлислар учун оғриқли мавзу – «Нефтчи»нинг қулаши ҳақида гаплашдик.

Саркисян кетгач...

Абдусамад Дўрмоновнинг айтишича, ўзбек футболи тарихидаги энг кучли жамоалардан бири бўлган, шонли ўтмишга эга «Нефтчи» бежизга бундай аҳволга тушиб қолмаган. Саркисян даврида жамоада тизим бўлган. Асосий жамоа ўз асосига эга бўлган, ўринбосарлар ва ёшлар жамоаси ҳам асосий жамоа ўзагида ривожланиб борган, услуб бир хил бўлган. Шу боис ўринбосарлар жамоаси футболчисининг асосий жамоага ўтиши муаммосиз кечган.

Дўрмонов охирги йилларда «Нефтчи» хоҳлаган келиб кетадиган жамоага айланиб қолганини айтди: «2018 йил «Нефтчи» қуйи дивизионга тушиб кетгач, ёш футболчилардан иборат жамоа туздик. Йигитларни тўплаганда аввало «Нефтчи» футболимиздаги бренд эканини тушунтириб бердик. Руҳий жиҳатдан мана қандай катта жамоада ўйнашаётганини тушунтиришга ҳаракат қилдик. Гапларимиз таъсир қилдими, иккинчи даврада футболчиларимизда ўзига бўлган ишончи ошди, улар бошқача ўйнай бошлашди.

Охирги йилларда «Нефтчи» хоҳлаган келиб кетадиган жамоага айланиб қолганди. Таркиб ҳар йили деярли тўлиқ ўзгарадиган бўлиб қолди. Бундай бўлмаслиги керак, жамоада асос бўлиши лозим».

«Иккинчи юлдузни сизга қолдирдик...»

«Нефтчи» бош мураббийининг айтишича, барча мамлакатларда иккинчи дивизион энг мураккаби ҳисобланган, жумладан Ўзбекистонда ҳам: «Ҳамма мамлакатларда энг қийини айнан иккинчи дивизион. Англияда Чемпионшип, Испанияда Сегунда, бизда эса Про-Лига. Ҳақиқий кескин футбол шу ерда. Бу ерда югурмай натижага эришиб бўлмайди. Футболчиларга ҳам буни кўп айтамиз.

Бизда ҳозир ёш футболчилар тўпланган: 1998, 1999, 2000 йил болалар. Табиийки улар бизнинг ўйинимизни кўрмаган. Бир куни улардан бири менга сиз ҳам «Нефтчи»да ўйнаганми, деб сўраб қолди. Ҳа, адашиб келиб қолиб, 10 йил қолиб кетганман, деб ҳазиллашиб қўйдим. Мана, биз битта юлдузчани олдик (Ўзбекистон чемпионатида 5 марта ғолиблик учун бериладиган юлдузча), иккинчи юлдузчани сизларга қолдирдик, деб айтдим».

Абдусамад Дўрмонов билан тўлиқ суҳбатни Kun.uz ва Tribuna.uz сайтларининг ижтимоий тармоқлардаги саҳифаларида кўришингиз мумкин.

#FootWeek'нинг бу сонида яна кўплаб қизиқарли мавзулардаги мулоҳазалар эътиборингизга ҳавола этилган. 2006 йилги мундиал кўпчиликнинг хотирасида Зиданнинг Матераццини калла қўйгани билан эсда қолган. Биз ҳам ана шу воқеани эслаймиз. Мундиаллар мавзусида яна бир мавзу – Испаниянинг ЖЧ-2010 ғолиби бўлгани ва ғалаба голини ёдга оламиз.

Беларусь чемпионатини забт этаётган ўзбекистонлик икки юлдуз –Жасур Яхшибоев ва Шаҳбоз Умаров тобора очилиб бормоқда. Уларнинг ўйинлари, голлари ва статистикасига алоҳида тўхталамиз. Шунингдек, янги сонда 43-уринишда жаримадан гол урган Роналду, 100лик маррани забт этган Варди ва футболчи-сиёсатчилар каби кўплаб қизиқарли мавзуларга тўхталамиз. Юз марта эшитгандан бир марта кўрган яхши – #FootWeek'нинг янги сонини томоша қилинг.