Human ХБАдан жабрланганларнинг ҳаммасига ҳам пуллар қайтариб берилмаган. Бунга нима сабаб бўлганди?

Жорий йилнинг 17 февраль куни бош вазир Абдулла Арипов Human хусусий бандлик агентлигидан жабр кўрган фуқаролар билан учрашиб, 1086 нафар алданган фуқарога қайтарилиши лозим бўлган 21 миллиард сўмдан ортиқ моддий зарар давлат томонидан шошилинч равишда қоплаб берилишини айтан эди. Бунинг ижросини таъминлаш учун бош вазир Бандлик ва меҳнат муносабатлари вазири ҳамда «Ипотекабанк» раҳбарига топшириқ бериб, барча жабрланувчиларга 2 кун ичида банк пластик карточкаси очиб бериш ва 24 соат ичида карточкага пул ўтказиб бериш вазифасини юклаган эди.

20 февраль ҳолатига қисқа муддат давомида 916 нафар ундирувчига банк хизмат ҳақи ундирилмасдан банк картаси очилиб, шундан 819 нафарига суд ҳужжатида кўрсатилган 17,2 млрд сўм пул маблағлари ўтказилиши таъминланган. Бундан ташқари, МИБ матбуот хизмати томонидан моддий зарарни қайтариш масаласида мурожаат этмаган 69 нафар фуқарога ҳудудларда ташкил этилган ишчи гуруҳларга мурожаат қилишлари ва етказилган зарарлар қисқа муддатда уларнинг ҳисоб рақамларига ўтказилиши маълум қилинганди.

Маълум бўлишича, жабрланувчилар орасида ҳамон пулларини қайтаролмай овора бўлиб юрганлар ҳам бор экан. Жумладан, таҳририятга мурожаат қилган Ўткир Акмалович Каримовни ҳам айни шу масала қийнамоқда.

У 2019 йилнинг 13 февралида укаси И.Каримов орқали Human хусусий бандлик агентлиги билан хорижда ишга жойлаштириш бўйича хизматлар кўрсатиш тўғрисида шартнома тузиб, агентликка 23 млн сўм пул тўлаган.

«Шартнома шартларига кўра, 6 ой ичида мени жўнатишлари керак эди. Лекин жўнатилмадим. Мен шартномани бекор қилдим. Кейин агентлик устидан жиноий иш очилди. Барча жабрланганларни тергов ва судга чақиришган. Мени ҳам ариза билан мурожаат қилганимдан сўнг Нурота туман ИИБ ТБ терговчиси сўроқ қилиб, жабрланувчи деб топди ва тегишли ҳужжатларни расмийлаштириб, Тошкентга юборишини айтди. Лекин рўйхатда исм-шарифим чиқмади. Ички ишлар органларига бир неча бор мурожаат қилдим, улар «ишингиз терговда кўриб чиқиляпти», дейишади. Лекин ким кўряпти, қайси босқичда билмаяпман», дейди Ў.Каримов.

Мурожаатчининг баён қилишича, у дастлаб Human хусусий бандлик агентлигидан жабр кўрганларнинг пулини қайтариш билан шуғулланадиган Навоий вилоятидаги ишчи гуруҳга учраган. Ишчи гуруҳ вакиллари унга жиноят ишига жабрланувчи сифатида киритилганлар асосида рўйхат шакллантирилиши, ана шуларга пуллари қайтариб берилиши, бу рўйхатда эса Ў.Каримов йўқлигини маълум қилишган.

Мазкур ҳолатга аниқлик киритиш мақсадида Ички ишлар вазирлиги ҳузуридаги Тергов департаментидан изоҳ олдик. Департаментнинг жамоатчилик билан алоқалар бўйича масъул ходими Адхамжон Абдуллаевнинг маълум қилишича, дастлабки терговда жиноят ишининг Ў.Каримов ва у каби бошқа бир нечта жабрланувчиларига оид қисми алоҳида иш юритувга ажратиб олинган. Кейинроқ Ў.Каримов ҳам расман сўроқ қилинган ва жиноят ишида жабрланувчи сифатида эътироф этилган. Ҳозирда қолган жабрланувчилардан иборат иккинчи рўйхат ҳам шакллантирилган. Мазкур жиноят ишининг тергови ҳам айблов хулосаси билан якунланиб, ўн кун аввал тасдиқлаш ва тегишли судловга ўтказиш учун прокуратурага юборилган», дейди А.Абдуллаев.

Аббос Салайдинов