Коронавирус: Жанубий Кореядаги рекорд ўсишнинг сабаби нима?

Бу галги вирус ўчоғи – черков
Пойтахт Сеул шаҳридаги черковда бўлган 4500 кишидан 313 нафарида вирус аниқланди. Черков ибодат учун ёпилди ва муҳрланди.

Маросимда қатнашганларнинг барчаси карантинга олинган, «Саранг Жейл» черкови жойлашган ҳудудда эса комендантлик соати жорий этилди.

Пойтахт Сеулда жамоавий тадбирларда қатнашиш сони 50 киши этиб белгиланди.

Президент Мун Жэ Инга қарши норозилик намойишлари уюштирган черков аъзолари эса уларнинг ҳаракатлари коронавирус баҳонасида бостиришга уринилаётганини айтишмоқда.

Черков аъзоларидан бири 15 августдаги норозилик намойишларидан олдин черковда вирус бўлмаганини, намойишдан бир кун олдин ўтказилган тестларда эса 300та янги ҳолат аниқланганини айтди. «Бу ҳукуматнинг иши. Улар вирус баҳонасида норозилик намойишларимизнинг олдини олишмоқчи», деди у.

Минтақада яшовчилар ҳукуматдан шикоят қилишмоқда. Сеуллик бир фуқаро ҳокимият вакиллари «черковни аввалроқ ёпиб қўйишлари керак эди» деб таъкидлаган. «Қўшниларимникига ҳам чиқа олмаяпман, супермаркетга бора олмаяпман. Улар черковга жуда юмшоқ муносабатда бўлишди. Энди эса бадалини биз тўлаяпмиз», деди у.

Маълумот учун, эпидемиядан энг кўп зарар кўрган Тэгу шаҳрида ҳам вирус яширин бир мазҳаб ўтказган маросимидан кейин тарқалганди.

Биринчи тўлқин апрелгача давом этгани айтилганди
Июнь ойининг иккинчи ярмида Жанубий Корея расмийлари янги кўтарилиш билан бир неча ойлар давомида касалликни йўқ қилиб бўлмаслиги ҳақида огоҳлантирганди.

Эпидемия профилактикаси ва назорати марказининг раҳбари Жеонг Юн-Кённинг таъкидлашича, эпидемиянинг биринчи тўлқини мамлакатда апрелгача давом этган.

Аммо май ойидан бошлаб баъзи жойларда, шу жумладан, пойтахт Сеулнинг тунги клубларида вирусга чалиниш билан боғлиқ янги гуруҳлар пайдо бўлган.

Ўшанда – биринчи тўлқиннинг бошланиши ва унинг якуни орасидаги энг юқори чўққида мингга кўтарилган вирусга чалиниш ҳолатларининг сони кетма-кет уч кун давомида нолга туширилганди.

Шунингдек, доктор Жеонг сўнгги ҳолатлар билан мамлакатда эпидемиянинг иккинчи тўлқини бошланганини ва бу давом этишини таъкидлаган эди. Унинг айтишича, май ойининг бошларидаги байрам таътили пойтахт Сеулда кучайган янги тўлқиннинг бошланиши бўлган. Зотан, ушбу минтақада муқаддам ҳолатлар сони жуда кам эди.

Қандай чоралар кўрилди?
Жанубий Кореяда кўрилган ҳимоя чоралари карантин жорий этишни ёки ҳар қандай ҳудудга саёҳат қилишни тақиқлашни кўзда тутмади. Мавжуд усул шубҳали ўзгаришларни кузатиш ва даволашни бошқариш жараёнини ўз ичига олади.

50 миллиондан ортиқ аҳолига эга Жанубий Корея айни кунга қадар ушбу касалликнинг тарқалишининг олдини олиш учун жиддий ҳаракат қилди. Мактаблар ёпилди, уйдан туриб ишлаш ташвиқ қилинди, одамларнинг бир жойда тўпланишига сабаб бўлувчи тадбирларга барҳам берилди.

Бироқ пойтахт Сеулда кўчаларга чиқаётганлар сони кундан кунга кўпайиб борди. Ресторан, автобуслар, метро қайтадан тўла бошлади.

Коронавирус таҳдидига қарши чоралар кўриш одатий ҳолга айланди. Гавжум биноларнинг кириш қисмида одамларнинг тана ҳарорати термометр камералари билан ўлчанди.

Лифтларда қўлларни тозалаш учун дезинфекция воситалари ўрнатилди. Метроларнинг кириш қисмида махсус кийинган мутахассислар одамларга қўлларини тез-тез ювишни эслатиб туришди.

Чоралар янгидан кучайтирилганди
22 июнь куни эрта тонгда пойтахт Сеулнинг жанубидаги Дижеон шаҳар маъмурлари оз сонли янги ҳолатлар аниқланиши ортидан музей, кутубхона каби жамоат жойларида йиғилишни тақиқлаганди.

Сеул мэри ҳам агар кейинги уч кун ичида ҳар куни янги ҳолатлар сони 30тани ташкил этса ва касалхоналарнинг тўлиқлик даражаси 70 фоиздан ошса, шаҳарда ижтимоий масофа чоралари эълон қилиниши мумкинлигини айтганди.