Microsoft ҳакерлар яна сайловга аралашаётганини айтди. Москва яна барчасини рад этди

«2016 йилги сайловларга ҳам ўз таъсирини ўтказган россиялик ҳакерлар бу сафар ҳам яна шундай ишга қўл урмоқчи», дейилади Microsoft баёнотида.

Баёнотда бу ҳаракатлар сайловга қаратилгани айтиб ўтилган. Амалдаги президент Дональд Трамп ва унинг сайловлардаги асосий рақиби демократ Жо Байденнинг кампаниялари киберҳужумларнинг асосий нишони бўлиб турибди.

Microsoft баёнотида айтилишича, шу кунга қадар «Strontium» гуруҳи аъзолари 200дан ортиқ ташкилотга ҳужум қилишган. Хусусан, республикачилар ва демократлар партияси таъминот тизимига ҳам. Улар Британия сиёсий партияларини ҳам нишонга олгани айтилмоқда.

Москва ва Пекин реакцияси
Россия ва Хитой бу хабарларни рад этди. Жума куни Россия президенти Владимир Путиннинг матбуот котиби Дмитрий Песков Кремль ҳеч қачон бошқа давлатларнинг сайловларига аралашишга уринмаганини таъкидлаб ўтди.

Хитой Ташқи ишлар вазирлиги вакили Чао Лижиан эса Microsoft Хитойга йўқ жойдан бунақа айб қўймаслиги кераклиги ҳақида гапирди.

Microsoft компаниясининг хавфсизлик масалалари бўйича вакили Том Бурт ўз блогидаги хабарида ҳужумлар 2019 йил сентябрида бошлангани ва шу кунгача давом этаётганини ёзган.

«2016 йилдагига ўхшаб «Strontium» фойдаланувчиларнинг номлари ва паролларини йиғиш мақсадида уларнинг аккаунтларини бузиш учун ҳаракатларни бошлашмоқда. Эҳтимол, бу разведка маълумотларини йиғиш ёки уларга аралашиш учун бошланаётган операцияларидир», деб сўзларини давом эттиради Бурт.

Бироқ компанияга кўра, киберҳужумларнинг аксарияти муваффақиятли бўлмаган.

Microsoft, шунингдек, хитойлик кибергуруҳлар Байден кампаниясига алоқадор бўлган шахсларнинг шахсий электрон почталарига ва аввал Трамп маъмуриятига алоқадор бўлган камида битта таниқли шахсга ҳам киберҳужумлар уюштирганини маълум қилди.

Шу билан бирга, Халқаро алоқалар ҳамжамияти, академик институтлар ва сиёсий ташкилотларнинг таниқли шахслари ҳам Хитойнинг «Strontium» номи билан танилган ҳакерлик гуруҳи томонидан нишонга олинганини айтган.

Microsoft’нинг қўшимча қилишича, Эроннинг «Фосфор» номли гуруҳи шу йилнинг май ва июнь ойлари оралиғида Оқ уй расмийлари ва президент Трампнинг сайловолди штабининг аккаунтларини бузиб киришга уринган, аммо бунинг уддасидан чиқа олишмаган.

Компания Россия, Хитой ва эронлик ҳакерларнинг аниқ мақсадларини аниқлай олмади. Июнь ойида Google Хитой ва Эрон томонидан АҚШдаги таъминот тизимларига киберҳужумга уринишлар амалга оширилганини маълум қилган.

Трамп кампанияси матбуот котиби ўринбосари Т. МакДональд бу борада шундай деди: «Биз катта нишонмиз, шунинг учун кампанияга ёки бизнинг ходимларимизга қаратилган зарарли ҳаракатларни кўриш ажабланарли ҳолат эмас».

Байден кампаниясининг расмий вакили эса аввалданоқ кампаниянинг бу каби ҳужумларга дучор бўлишини билгани ва уларга тайёрлигини билдирган.

Икки партиявийлик сайловига аралашиш
Нада Тавфик таҳлили. ББC’нинг Шимолий Aмерика бўйича мухбири.

2016 йилда Россиянинг сайловга таъсир ўтказишга бўлган уринишлари тезда сиёсийлаштирилиб, президентнинг баъзи тарафдорлари томонидан бу ҳаракатлар тан олинмаганди. Microsoft’га кўра, сайловларга аралашиш икки партия – ҳам республикачиларни, ҳам демократларни хавф остида қолдиради. Бу эса демократик жараёнга бўладиган таҳдидларнинг олдини олиш чораларини кўриб чиқиш кераклигини англатади.

Том Бурт ўз постида сайловлар инфратузилмасини ҳимоя қилиш учун давлат томонидан қўшимча маблағ ажратилиши кераклигига ишора қилди. Шунингдек, у мамлакатларни глобал ташаббуслар, жумладан, БМТ амалга оширилаётган ишлар орқали кибержиноятчиликка қарши курашиш ва хавфсизликни таъминлашга барчани даъват қилди.

Трамп маъмурияти қандай жавоб қайтарди?
Ички ишлар вазирлигининг юқори даражадаги амалдори Кристофер Кребснинг айтишича, Microsoft’нинг ушбу огоҳлантиришларидан AҚШ разведкачилари аллақачон хабардорлигини айтиб ўтди.

«Шуни таъкидлаш керакки, ҳеч бир ҳаракат овоз бериш жараёнига ва сайлов тизимларига таъсир кўрсата олмайди», деди Кребс.

Aввалроқ, Трамп маъмурияти Россия фуқаросини AҚШ сиёсий жараёнларига аралашишни режалаштиришда айблаган эди. AҚШ разведкаси вакиллари эса август ойида Хитой, Россия ва Эрон ноябрдаги президентлик сайловларига аралашишга фаол равишда уринишаётганини айтиб ўтган эди.

2016 йилда нима бўлганди?
AҚШ разведкачилари 2016 йилда Ҳиллари Клинтоннинг сайлов кампаниясига Россия томондан таъсир ўтказилганини маълум қилишганди.

Том Буртнинг сўзларига кўра, «Россия иши»ни суриштирган махсус прокурор Роберт Мюллер ўз ҳисоботида ҳакерлар гуруҳи 2016 йилги президентликка номзод Ҳиллари Клинтоннинг электрон почтасини бузиб кирганини айтган. Ҳакерлар кампаниядан ўн минглаб электрон почта хабарларини олиб, тарқатишга муваффақ бўлишади. Facebook ҳисоб-китобларига кўра, сайлов арафасида 126 миллион америкаликнинг аккаунтига ҳужум уюштирилган.

Кремль рад этди
Россия президентининг матбуот котиби Дмитрий Песковнинг айтишича, Microsoft’нинг AҚШдаги сайловларга Россиянинг аралашуви ҳақидаги топилмалари аниқ далилларга эга эмас. «Афсуски, бу каби гапларни биринчи бор эшитмаяпмиз. Яна такрорлашим мумкин, Россия ҳеч бир давлатнинг ички ишларига ёки сайлов жараёнларига аралашмаган, аралашмайди ва аралашмоқчи эмас», дея Песковнинг сўзларини келтирган ТAСС.