Қирғизистон президенти лавозимига номзодлардан ҳужжатлар 7 декабргача қабул қилинади 

Қирғизистонда муддатдан аввал ўтадиган президент сайловларида иштирок этишни истовчилардан ҳужжатлар қабул қилиниши 7 декабргача давом этади. Сайловлар ўтказилиши 2021 йил 10 январига белгиланган.

Қирғизистонда амалдаги қонунларга кўра, президент вазифасини бажараётган бош вазир Садир Жапаров президент лавозимига номзодини қўя олмайди. Бироқ мамлакат парламенти яқин орада Жапаровга сайловларда иштирок этиш имконини берувчи бир қатор қонунларни қабул қилмоқчи.

25 октябрда Жапаров президент сайловлари 10 январда ўтишини тасдиқлаган. У, шунингдек, парламентга сайловлар 2020 йилнинг 20 декабрида ўтиши ҳақида тарқатилаётган ёлғон хабарларга ишонмасликни ва Жўқорғу Кенешга сайловлар 2021 йилнинг биринчи ярмида ўтказилмаслигини таъкидлаб ўтган.