АҚШ ҳукумати БААга 50 дона F-35 қирувчи самолёти сотилишини қўллаб-қувватлади

Манбаларнинг маълумот беришича, шартнома қиймати 10,4 млрд долларни ташкил этади.

Фото: Flickr

АҚШ давлат департаменти конгрессга Lockheed Martin компаниясининг 50 дона F-35 қирувчи самолёти Бирлашган Араб Амирликларига сотилишини қўллаб-қувватлашини маълум қилди. Бу ҳақда Bloomberg агентлиги хабар бермоқда.

Агентлик манбаларининг берган маълумотларига кўра, шартнома қиймати 10,4 млрд долларни ташкил этади.

Аввалроқ Исроил F-35 қирувчилари етказиб берилишига қатъий қарши чиққанди. 23 октябрь куни Исроил бош вазири Бинямин Нетаняху ва Мудофаа вазири Бени Ганц Вашингтоннинг БААга қирувчи самолётлар сотишига эътироз билдирмасликка қарор қилишди.

F-35 – ядро қуролини таший оладиган қирувчи самолёт бўлиб, уни яратиш лойиҳасида АҚШ билан бирга саккизта давлат иштирок этган.