«Энди врачларга бир оғиз қаттиқ гапирмайман» – Қайнона туғруқхона ходимларининг хизматини эътироф этди

«Ижтимоий тармоқларда тиббиёт ходимлари ва уларнинг фаолияти билан боғлиқ турли хил нохуш хабарлар шиддат билан тарқалиб кетиши бор гап. Аммо профессионал фаолияти доирасида инсонлар ҳаётини сақлаб қолишдек шарафли вазифани адо этаётган шифокорлар хизмати кўзга кўп ташланмайди. Аммо ҳеч бир холис хизмат эътирофсиз қолмайди. Ижтимоий тармоқларда тарқалган «Нишон тумани тиббиёт бирлашмаси туғруқ комплекси шифокорлари! Олтин қўлларингиз дард кўрмасин! Оқ халатингизга гард юқмасин!» сарлавҳали мақолада шундай шифокорлар меҳнати учун миннатдорчилик билдирилади. Қуйида ушбу мақолани келтиришга қарор қилдик. Унда тилга олинган шифокорлар мамлакатимизнинг ҳар бир чеккасида борлигига шубҳа йўқ», дейилади вазирлик хабарида.

«Соат 23:00 ларда ҳомиладор келинимни туманимиз шифохонасига олиб келдик. 10 йиллик танаффусдан кейин катта набирам укалик бўлиш арафасида...

Тонг отгунча кутдик, бу орада яна бир неча аёлни қабул қилишди.

Тонгача янгилик йўқ... Эрталаб врачлар кесарча қилиш эҳтимоли хақида гап очишди.

Ваҳимага тушдим. Қудам билан маслаҳатимизни эшитган бир киши: «Булар мол дўхтир сал нарсага пичоққа ёпишади», – деб қолди.

Бу гаплардан бадтар ваҳима босди мени. Ўзим яхши танимайдиган врачлардан кўнглим қора бўлди... Ва кесарчага кўнмадим.... Врачлар қанчалик тушунтиришга уринишса ҳам бизни кўндиролмади.

Мен ҳам ташқарига чиқиб туғруқхона рўпарасидаги ўриндиққа ўтирдим. Келинимнинг онасига врачлар ҳақида эшитганларимни айтиб ёзғирдим. Вилоятга олиб кетсакмикан, деб ўйлаб қўйдим.

Вақт ўтяпти... Хурсанд бўлиб , туғилган невара, жиян, фарзандларни олиб кетишяпти.

Тушдан кейин бўлимга кирдим, икки врач Марям Тошева билан Гулноз Шопўлатова менга тушунтира кетишди. «Рози бўлмасангиз бўлмайди», деб. «Майли, яна озроқ кутинглар, биз ҳам керакли муолажаларни қиламиз», деб шошилинч операция хонасига кириб кетишди. Мен ичкарида – бўлимда қолдим.

Кечгача шу бўлимда ўтириб, шифокорларга раҳмим кела бошлади. Операциядан чиқиб, яна операцияга киришади...

Шу куннинг ўзида кечгача икки аёл – врач акушер-гинекологлар ўз бригадаси билан 12 нафар аёлнинг туғруқ жараёнини эсон-омон ўтказиб олиши учун хизмат қилишди. Шулардан 5 нафари жарроҳлик, яъни кесарча йўли билан амалга ошди. Ярим соат ҳам тин олишмади, тушлик қилишга вақтлари бўлмади...

Буни кўриб, улар хақида ўйлаган хунук ўйларимдан уялдим, тўғриси.

Врачларга айтдим: «Нимани тўғри деб билсангиз, шуни қилинглар, биз розимиз».

Ўзимга ўзим дедим: «Яратган эгам бизни суюнтирсин. Менга ниманики раво кўрган бўлмасин, мана шу қўли қўлига тегмай хизмат қилаётган врачларга бир оғиз қаттиқ гапирмайман».

Келганимизга 1 сутка бўлаёзганида, операция хонасидан менинг набирамни бағрига босиб, педиатр Абдурашид Холматов чиқиб: «Хола, табриклайман, қизча билан» деб, уни чақалоқлар хонасига олиб кириб кетди. Яратганга беҳисоб шукрлар бўлсин, бугун мен ҳам шифохонадан хурсанд бўлиб кетган кўпчилик сафига қўшилдим.

Ҳурматли шифокорларимиз, ўз касбининг фидокорлари – Марям Тошева, Гулноз Шопўлатова, устоз шифокор Анора Даутова, педиатрлар Абдурашид Холматов, Гулнора Султонова, анестезиолог Давлат Шоймуродов, доя Бибихол Раҳмонова ва меҳрибон ҳамширалар, барчангизга каттадан катта раҳмат!»