Трамп сайловлардаги сохталаштиришларга ФҚБ ва адлия вазирлиги алоқадор бўлиши мумкинлигини айтди

АҚШнинг амалдаги президенти Доналд Трамп Fox News телеканалига берган интервьюсида АҚШ адлия вазирлиги ва Федерал қидирувлар бюроси ходимлари мамлакатда ўтган президент сайловларидаги сохталаштиришларга алоқадор бўлиши мумкинлигини айтди. 

ОАВ демократ Жо Байденни 3 ноябрда ўтган сайловларнинг ғолиби деб эълон қилди. Бироқ сайловларнинг расмий натижалари декабрда эълон қилинади.

АҚШ президентининг таъкидлашича, сайловлар давомида 10-15 йил аввал вафот этган одамлар номидан ҳам кўплаб овозлар берилган.

“Бу сайловлар – ёппасига фирибгарлик. ФҚБ ва адлия вазирлиги қаёққа қаради? Билмадим, балки улар бунга алоқадордир... Ушбу сайловлар сохталаштирилди, ОАВ бу ҳақида ёзишни истамаяпти”, деб айтган Трамп.

Унинг таъкидлашича, ОАВ ушбу фирибгарликларни ёритишни истамаяпти. “Бизда эркин матбуот йўқ”, деб қўшимча қилган Трамп.

АҚШ президентининг айтишича, АҚШда матбуот баъзи ҳодисаларга кўз юмиши мумкин. “Агар ОАВ бу ҳақида маълум қилмаса, сиз можаро уюштира олмайсиз”, деб таъкидлаб ўтган Трамп. 

Трамп Байденнинг ғалабасини тан олмаяпти. Унинг таъкидлашича, сайловлар демократлар томонидан кўплаб қоидабузарликлар билан ўтган. Жумладан, амалдаги президент Байден муҳим штатларда уларнинг коррупциялашгани сабабли ғалаба қозонган, деб таъкидламоқда.

Аввалроқ Трамп сайловчилар вакилларининг кўпчилиги Байденга овоз берса, Оқ уйни тарк этишини маълум қилган. Бироқ кейинроқ Трамп Байден сайловларда ғалаба қозонганини исботлай олса, унга ҳокимиятни топширишини айтган.