Tesla машинасининг ўз-ўзича тезлашиб кетиши билан боғлиқ навбатдаги йўл-транспорт ҳодисаси юз берди

Машина ҳайдовчисининг таъкидлашича, у машинанинг тезлашиб кетиши яхшилик билан тугамаслигини англаб, ундан сакраб тушиб олган. Tesla Model S седани 80 км/соат тезликда рул бошқаруви буйруқларига жавоб бермай қўйган ва уй томон йўналган. Бу воқеа юзасидан Tesla компаниясидан изоҳ берилмаган.

Бу жорий декабрда Tesla машинаси назорат остидан чиқаётган иккинчи ҳодиса ҳисобланади. Жанубий Кореяда ҳам юқорида келтирилганга ўхшаш йўл-транспорт ҳодисаси юз берган: Tesla Model X электрокари ўз-ўзидан тезлашиб, турар жой биноси олдидаги автотураргоҳ деворига урилган. Бунинг оқибатида машина ёниб кетган ва унинг ичидаги 3 йўловчидан бири ҳалок бўлган, 2 нафари жароҳат олган.

Tesla моделларининг назорат остидан чиқиши билан боғлиқ шундай ҳодисалар декабргача ҳам қайд қилинган. Жумладан, июнда Tesla Model 3 модели 127 км/соат тезликкача тезлашиб, тормоз тепкисининг босилишига жавоб бермай қўйган. Ҳайдовчи шу тарзда 8 кмча ўтгач, чиқинди уюмига бориб урилган. Оқибатда машина ёниб кетган. Августда ҳам ушбу модел тўхташни “истамаган” ва бунинг оқибатида бошқа машина билан тўқнашган.

2020 йил январда АҚШнинг Йўл ҳаракати хавфсизлиги миллий бошқармасига Tesla машиналарининг ўз-ўзича тезлашиб кетиши ҳолатлари қайд этилаётгани сабабли текширув ўтказиш ва ярим миллионта Tesla’ни чақиртириб олиш илтимос қилинган петиция юборилган. Петицияда 2012-2013 йилларда ишлаб чиқарилган Tesla Model S, 2016-2019 йилларда ишлаб чиқарилган Tesla Model X ва 2018-2019 йилларда ишлаб чиқарилган Tesla Model 3 моделлари ҳақида гап борган.