«Бола аълочи ёки иккичи бўлиб туғилмайди» — тадбиркор Шаҳноза Муҳамедова билан суҳбат

Kun.uz «Интеллект» рукнида муваффақиятли фаолияти билан жамиятда ўз ўрнини топган инсонлар билан суҳбатлар ташкил этишда давом этади. Навбатдаги суҳбатдошимиз – шахсий ривожланишга доир «Biznes Rivoj» лойиҳаси асосчиси Шаҳноза Муҳамедова бўлди.

Тадбиркор бир неча йиллар олдин ўзбек тилида мотивацион китоблар, медиамаҳсулотлар ва шахсий ривожланишга оид курслар жуда камлигини пайқайди ва шундан сўнг ўзи ёшларга ана шундай фойдали материалларни тақдим этишга қарор қилади.

«Барчаси инсоннинг ўз қўлида экани, ўз устида ишлаш, ўзига ишониш ва илм олиш билан мақсадларига эриша олишини ўзимда ҳис қилганман. Аммо мотивацион мақолалар, видеолар ҳаммаси инглиз, рус тилларида эди.

Ўзбек тилида манбалар қидира бошладим, лекин айнан ўз устида ишлашга, маркетинг, менежмент йўналишларида яхши нашрлар йўқ эди. Тил билмаган ёшларда ҳам бундай билимларни эгаллаш имконияти бўлиши керак, деган мақсадда бизнес бошқаруви, HR, маркетинг каби йўналишлардаги мақолаларни таржима қила бошладик. Фаолиятимиз шу тарзда бошланган», – дейди Шаҳноза Муҳамедова.

«9-синфгача яхши ўқимаганман»

— Мактаб пайтида ҳеч қачон MBA даражам бўлади, деб ўйламаганман. Андижонда, ўзбекча оилада катта бўлганман. Аввалига ўқишга бўлган қизиқишим юқори эмасди, 8-синфгача кўпроқ уй ишларида ёрдамлашишни ёқтирардим.

Кунларнинг бирида ойим сўраб қолганлар: «Ҳаётда ким бўлмоқчисан?» Мен уй бекаси бўлишни хоҳлашимни айтганман. Ойим эса бирор касбнинг зўр эгаси бўлишимни истаган. Кейинроқ дадам сўраганида эса: «Мен ҳам сиздек тадбиркор бўламан», дея жавоб берганман. Дадам: «Бунинг учун ҳозирги билимларинг етади, деб ўйлайсанми?» дея сўраганлар.

Шундан кейин ўқийман деб жиддий аҳд қилганман. 9-синфга ўтиш арафасида аввалги йиллардаги дарсликларни такроран ўрганиб чиққанман, 9-синфнинг 1-чорагига келиб аълочига айланганман. Мен бунгача инсон аълочи ёки иккичи бўлиб туғилади, деб ўйлаган эканман.

Тушунганманки, бола неча баҳога ўқиши ота-она ва ўқитувчиларнинг унга қандай муносабатда бўлишига боғлиқ. Бизда эса афсуски мактабларда ўқитувчиларнинг ўқувчини руҳлантириш ўрнига доим танқид қилиши одатий ҳол.

Америкада яшаб қолиш нияти билан борган талаба нега ортга қайтган?

— Бизнес бошқаруви йўналишида АҚШнинг Линкольн университетида магистратура босқичида ўқиганман. Америкада турмуш ўртоғим билан бирга яшадик, америкача ҳаёт тарзи билан танишдик. У ерда кўп нарса ўрганганман.

Америкада қолиш нияти билан кетгандик. Лекин бирор компанияда оддий ишчи эмас, ўзим муваффақиятли компания асосчиси бўлгим келган. АҚШда эса рақобат жуда кучли. У ерда кўп бозорлар эгаллаб бўлинган, бизда эса бозоримизга кириб келмаган маҳсулот ва хизматлар турлари жуда кўп.

Ўзбекистонда сифатли маҳсулот ярата оламан, ўз компаниямни муваффақиятли юрита оламан деган ишонч бўлган. Бизнес билан шуғулланишни ният қилганман-у, лекин қайтмасимдан олдин бу ҳали айнан қайси йўналишда бўлишини билмаганман. Қайтиб келгач эса таълим йўналишини танлаганман.

Тўлиқ суҳбатни юқоридаги видео орқали томоша қилишингиз мумкин.

Нафосат Тожибоева суҳбатлашди.
Тасвирчи – Муҳаммаджон Ғаниев.