Эрдўған Туркияда Хитой вакцинаси билан эмлаш қачондан бошланишини маълум қилди

Эрдўғаннинг сўзларига кўра, касалланиш даражаси пасайиши билан мамлакатда коронавирусга қарши кураш доирасида киритилган чекловлар босқичма-босқич юмшатиб борилади.

Фото: Anadolu Agency

Туркияда коронавирусга қарши эмлаш кампанияси 14 ёки 15 январда бошланади. Бу ҳақда Anadolu агентлиги хабар бермоқда.

Туркия президенти Ражаб Тоййиб Эрдўғаннинг маълум қилишича, мамлакатга Хитой вакцинаси етказиб берилиши бошланган.

Анқара шунингдек, Россия ва Британия вакциналарини ҳам кузатиб бормоқда, деди Эрдўған.

Унинг айтишича, касалланиш даражаси пасайиши билан мамлакатда коронавирусга қарши кураш доирасида киритилган чекловлар босқичма-босқич юмшатиб борилади.

Маълумотларга кўра, Туркияда охирги суткада 10,2 мингта касалланиш ҳолати аниқланган, 174 киши вафот этган. Пандемия бошланганидан буён мамлакатда 2,3 млн киши касалликка чалинган, 22,9 минг киши вафот этган.

Тайёрлаган Дилшод Аскаров

#Туркия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.