Жанубий Кореяда коронавирусга қарши эмлангандан кейин яна 3 киши вафот этди

Жанубий Кореяда AstraZeneca компаниясининг коронавирусга қарши вакцинаси билан эмлангандан кейин яна 3 киши вафот этди. Ушбу вакцинани олгандан кейин вафот этганлар сони 5 нафарга етди, деб хабар бермоқда Жанубий Кореянинг касалликларни назорат қилиш ва олдини олиш агентлиги (KDCA).  

Маълум қилинишича, вафот этганлардан икки нафари 50 ёшдан катта эркаклар бўлган. Улар кексалар учун мўлжалланган шифохонада даволанаётган бўлганлар. Бир эркак эмлангандан 41 соат, иккинчиси эса 15 соат ўтиб вафот этган. Учинчи вафот этган 30 ёшлар атрофидаги аёл киши бўлиб, у жиддий касалликларга эга ногиронлар шифохонаси бемори бўлган. У эмлангандан 15 соат ўтгач вафот этган.  

Аввалроқ Yonhap News Agency агентлиги Жанубий Корея ҳукумати AstraZeneca вакцинаси билан эмлангандан кейин вафот этган 2 кишининг ўлими сабабини тергов қилишни бошлаганини маълум қилганди. Улардан бири 50 ёшда, иккинчиси 63 ёшда бўлган. 63 ёшли эркакда эмланганидан бир кун ўтиб тана ҳарорати кўтарилган, 2 кун ўтиб эса у вафот этган.

2 март куни Австрияда Pfizer/BioNTech вакцинасидан эмлангандан кейин 41 киши вафот этгани маълум бўлганди. Улардан 3 нафарининг ўлими вакцина билан боғланмаган бўлган. Яна 11 киши инкубация даврида вафот этган. Вафот этганлардан 19 нафари жиддий касалликларга эга бўлган. Яна 8та ўлим ҳолати сабаби аниқлаштирилмоқда.