Фарғона вилоятига Бухоро вилоятидан қўйларни кўпайтиришга мўлжалланган яйлов майдонлари ажратилади

Вазирлар Маҳкамасининг “Фарғона вилоятига Бухоро вилоятидан қоракўл зотли қўйларни боқиш ва кўпайтиришга мўлжалланган яйлов майдонларини ажратиш тўғрисида”ги қарори лойиҳаси эълон қилинди.

Фарғона вилоят ҳокимлиги Маҳалла ва оилани қўллаб-қувватлаш вазирлиги ҳамда Бандлик ва меҳнат муносабатлари вазирлиги билан биргаликда вилоятда қоракўлчилик соҳасида иш фаолиятини бошламоқчи бўлган 1 000 нафар ёшлар рўйхатини шакллантиради.

Пиллачилик ва қоракўлчиликни ривожлантириш қўмитаси:

• 2021 йил 1 апрелга қадар Бухоро вилояти Пешку туманининг қоракўл қўйларини кўпайтиришга мўлжалланган яйлов майдонлари ҳолатини ўрганган ҳолда 15 минг гектар яйлов майдонлари ажратилишини;      
• фарғоналик ёшларнинг вилоятда мавжуд Қоракўлчилик наслчилик хўжаликлари томонидан етиштирилган арзон нархлардаги қоракўл зотли қўйлар билан таъминланишини;
• ёшларда қоракўлчилик соҳаси ҳамда қўй боқиш тажриба ва кўникмаларини шакллантириш мақсадида чўпонлар бириктирилишини таъминлайди.

Сув хўжалиги вазирлиги: 

• ёшларга чўл яйлов ҳудудларида яшаш шароитларини яратиб бериш мақсадида 100та кўчма вагонлар (яшаш контейнерлари) ажратилишини;
• “Ўзтрансгаз” АЖ, “Навоий кон-металлургия комбинати” АЖ билан биргаликда Саримой Газли ҳамда Саримой Зарафшон сув қувури орқали чорвачилик, боғдорчилик ва деҳқончилик йўналишларида фойдаланиш учун Пешку тумани “Жонгелди” МФЙ ҳудудини сув билан таъминлашни ташкил қилади.

Бухоро вилоят ҳокимлиги ёшларга суюлтирилган газ баллонлар ажратган ҳолда ҳар ойда бир марта газ ва сув таъминотини етказиш чораларини кўради.