Туркияда 15 мартдан мамлакатга кирувчилардан электрон анкета тўлдириш талаб қилинади

Туркия соғлиқни сақлаш вазирлиги мамлакатга кирувчилар учун қоғоз анкеталарни бекор қилди. 15 мартдан бошлаб йўловчилар парвоздан олдин электрон анкета тўлдиришлари керак бўлади. Бу ҳақда Royal Flight авиакомпанияси хабар берди.

"15 мартдан Туркияга кириш қоидалари ўзгаради. Мамлакат соғлиқни сақлаш вазирлиги Туркияга амалга ошириладиган барча рейсларда коронавирус бўйича қоғоз анкета тўлдириш талабини бекор қилмоқда. Йўловчилар бунинг ўрнига Туркияга парвоз қилишдан 72 соатгача бўлган вақт ичида https://register.health.gov.tr/# ҳаволаси орқали электрон анкетани тўлдиришлари лозим", - дейилади хабарда.

Қайд этилишича, анкета тўлдирилганидан сўнг уни чоп этиш ёки смартфон, планшет ёхуд бошқа қурилмаларга юклаб олиш керак. Йўловчилар парвоздан олдин чоп этилган ёки юклаб олинган анкетани авиакомпания ходимига кўрсатишлари керак бўлади.

"Анкетасиз самолёт бортига чиқишга рухсат берилмайди", - дейилади авиакомпания хабарида.