Олмазорда 11 нафар тадбиркорга 3,6 млрд сўм зарар етказган шахслар аниқланди 

Олмазор туманида 11 нафар тадбиркор манфаатларига 3,6 млрд сўм зарар етказган шахслар фаолияти фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Қайд этилишича, маҳкама ҳузуридаги департаментнинг Олмазор туман бўлими томонидан тадбиркорлик субъектларининг ҳуқуқ ва манфаатларини ҳимоя қилиш юзасидан терговга қадар текширув ўтказилган.

Текширув давомида, “M.m.” “A.” ва “Y.f.” МЧЖ раҳбарлари ва бошқалар олдиндан ўзаро тил бириктириб, 11та хўжалик юритувчи субъектлардан олинган 3,6 млрд сўмлик дори воситаларини нақд пулга сотиб юбориб, савдодан тушган пулларни тўламасдан фирибгарлик йўли билан ўзганинг жуда кўп миқдордаги мулкини қўлга киритганликлари аниқланган.

Мазкур ҳолат юзасидан жамият раҳбарлари ва бошқаларга нисбатан Жиноят кодексининг 168-моддаси (фирибгарлик) билан жиноят иши қўзғатилди.

Тергов ҳаракатлари ўтказилмоқда, дейилади хабарда.

Аввалроқ, тадбиркорга ўқотар қурол ўқталиб, 70 000 доллар пул талаб қилган жиноий гуруҳ аниқланганди.