Норвегияда AstraZeneca вакцинаси билан эмланган уч нафар шифокор шифохонага ётқизилди

Норвегияда AstraZeneca вакцинаси билан эмланган уч нафар шифокор тромблар ҳосил бўлиши сабабли шифохонага ётқизилди. Бу ҳақда Aftenposten нашри хабар бермоқда.

Норвегия дори воситалари агентлигининг билдиришича, ушбу вакцина билан эмланган бир неча кишида жиддий ёки сезиларли бўлмаган қон кетишлар юз бергани ҳақида ҳам маълумотлар бор.

«Бу тромбоцитлар миқдори камайиши белгиси бўлиши мумкин», — деди агентлик вакили Сигурд Хортемо.

Аввалроқ Хорватияда AstraZeneca вакцинаси билан эмланган 91 ёшли аёл ўпка тромбоэмболиясидан вафот этгани маълум қилинганди.

Дания, Норвегия, Австрия, Италия, Исландия пайшанба куни вакцинадан фойдаланишни тўхтатди, жума куни Таиландда эмлаш кампанияси кечиктирилгани маълум қилинди.

Европа дори воситалари агентлиги (EMA) пайшанба куни AstraZeneca вакцинасидан воз кечишни тавсия қилмаганини билдириб, препаратни қабул қилганлар қон томирларида тромбоз пайдо бўлаётганига далил йўқлигини маълум қилди. Агентлик давлатларга текширувлар давом этаётган пайтда ҳам эмлашни тўхтатмасликка чақирди.