Туркияда сайёҳлик соҳаси ишчилари коронавирусга қарши навбатдан ташқари эмланмоқда

Туркияда сайёҳлик соҳаси ишчиларининг коронавирусга қарши навбатдан ташқари эмланиши бошланди. Биринчи навбатда вакцинани меҳмонхоналарнинг мижозларни кутиб олувчи ишчилари олади.  

Эмлаш “Хавфсиз туризм дастури” доирасида ўтказилмоқда. Ушбу имкониятдан туризм вазирлиги томонидан сертификатланган меҳмонхоналар, озиқ-овқат ва ичимликлар ишлаб чиқарувчи корхоналар, туристик агентлик ходимлари, гидлар ва туристик транспорт ҳайдовчилари фойдалана оладилар.  

Туркияда коронавирусга қарши эмлаш январда бошланганди. Биринчи навбатда шифокорлар, ўқитувчилар ва кексаларни эмлаш белгиланган. Мамлакатда 10 млндан кўпроқ одам Хитойнинг СoronaVac вакцинаси билан эмланиб бўлган. Улардан 2,5 млн нафари вакцинанинг икки дозасини ҳам олган.  

Бундан ташқари, 15 мартдан Туркияга кирувчи хорижликлар электрон анкета тўлдиришлари керак бўлади. Ушбу чора инфекция тарқалишини тўхтатишга қаратилган.

Шу билан бирга, Анқара 15 апрелдан сайёҳлар учун мажбурий ПЦР-тестларни бекор қилмоқчи, бироқ бу мамлакатдаги эпидемиологик вазиятга боғлиқ бўлади.