Хитойда Ўзбекистон 1 млн доза олишни режалаштирган вакцинадан фойдаланишга рухсат берилди

Хитой фанлар академиясининг билдиришича, вакцинанинг биринчи ва иккинчи босқич клиник синовлари ўтган йил октябрда якунланган. Синов натижалари тўлиқ эмлашдан сўнг эмланганларда жиддий ножўя таъсирлар кузатилмаганлигини кўрсатган.

Фото: Хитой Фанлар академияси

Хитой ҳукумати фавқулодда ҳолатларда фойдаланиш учун коронавирусга қарши тўртинчи вакцинани маъқуллади, деб хабар берди Global Times.

Хабарда айтилишича, вакцина Хитой касалликларни назорат қилиш ва олдини олиш маркази директори, академик Гао Фу ҳамда Хитой фанлар академияси бошчилигидаги хитойлик олимлар гуруҳи томонидан ишлаб чиқилган.

Маълумот берилишича, учинчи босқич клиник синовлари Хитой, Ўзбекистон, Покистон, Эквадор ва Индонезияда 2020 йил ноябрда бошланган.

Феврал ўрталарида Ўзбекистон Хитойнинг ZF 2001 вакцинасидан 1 млн доза харид қилиши тўғрисида хабар берилганди.

Хабарга кўра, Ўзбекистон ZF 2001 вакцинасини бирга яратган ҳаммуаллиф мамлакат сифатида белгиланган.

“Бу янги вакцина ZF-UZ-VAC 2001 номи остида биргаликда ишлаб чиқарилади ва фойдаланилади”, дейилганди хабарда.

ZF-UZ-VAC 2001 вакцинаси Ўзбекистонда 1 март куни давлат рўйхатидан ўтказилди.

Тайёрлаган Дилшод Аскаров

#Хитой #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.