Асакада ота фарзанди учун олдиндан 105 млн сўм алимент пулларини тўлаб берди

Асака туманида яшовчи ота фарзанди учун 18 ёшга тўлгунига қадар тўлаши керак бўлган алимент пулини аввалдан тўлаб қўйди.

Фуқаролик ишлари бўйича Асака туманлараро судининг ижро ҳужжатига асосан қарздор Ш.Х.дан ундирувчи М.Р. фойдасига вояга етмаган бир нафар фарзанди моддий таъминоти учун алимент ундириш белгиланган.
  
Мажбуриятини англаган ота фарзандининг 18 ёшгача бўлган алимент пулларини собиқ турмуш ўртоғи билан ўзаро келишган ҳолда олдиндан тўлаб беришини маълум қилди.

Ҳисоблаб берилган 105 млн сўм алимент пулларини собиқ турмуш ўртоғи тўлиқ олгандан сўнг ҳужжатлар расмийлаштирилиб, қарздор отага нисбатан қўлланилган барча чекловлар бекор қилинди.

Аввалроқ Шаҳрихонда алимент тўламаган ота 15 суткага қамалгани хабар берилган эди.