Қашқадарёда эшак сўйиб сотмоқчи бўлганлар аниқланди. Улар бу иш билан аввалдан шуғулланиб келган бўлиши мумкин

Фото: Nasafnews

Қарши шаҳридаги хонадонларнинг биридан 20 бош эшак ва яна анча эшак гўшти топилган. Қашқадарё вилояти ИИБ ахборот хизматининг маълум қилишича, эшаклар сўйиб сотиш мақсадида олиб келинган ва сўйилган.

Маълум қилинишича, 2021 йил 5 апрель куни Қашқадарё вилоят ИИБ ЖҚБ коррупция ва иқтисодий жиноятларга қарши курашиш бўлими ва Қарши шаҳар ИИО ФМБ ходимларининг тезкор саъй-ҳаракатлари натижасида, Қарши шаҳар «Арабхона» маҳалла фуқаролар йиғини, Янгибоғ кўчасида яшовчи Х.Ш.нинг хонадонида фуқаро Х.Ж. эшак сўяётгани аниқланган.

Текширув давомида ички ишлар органлари ходимлари томонидан ушбу хонадонда бўғизланган эшаклар ва уларнинг ажратилган терилари, хоналардан бирида эса эшак гўшти деб гумонланган лаҳм гўшт борлиги аниқланган. Бундан ташқари, хонадонда 20 бош тирик эшак ҳам бўлган.

Суриштирув давомида ушбу эшаклардан қандай мақсадда фойдаланиши ҳақида фуқаро Х.Ж.дан сўралганда, у эшак гўштини сотиш мақсадида сўйишини айтган.

Шундан сўнг Қарши шаҳар ветеринария ва чорвачиликни ривожлантириш бўлимига олинган лаҳм гўшт маҳсулотларининг яроқли ёки яроқсизлигини аниқлаш мақсадида экспертиза тайинланган. Бўлимнинг озиқ-овқат маҳсулотлари хавфсизлиги микробиология ветеринария-санитария экспертиза лабораторияси томонидан берилган экспертиза хулосасида гўшт маҳсулотлари истеъмолга яроқсизлиги маълум қилинган.

Натижада, олинган лаҳм гўшт ва терилар белгиланган тартибда йўқ қилинган.

Таъкидланишича, мазкур ҳолат юзасидан терговга қадар суриштирув ишлари олиб борилмоқда. Ўтказилаётган текширув натижаларига кўра, қўшимча маълумот эълон қилинади.

Цирк ҳайвони учун озуқа, гўшт ва қимматбаҳо тери: Ўзбекистонда эшаклар сони камайиб кетяптими?

“Эшак гўштини ҳатто итларга ҳам беришмайди, улар эса одамларга пулламоқда...”