«Корхоналар ишлаб чиқарган маҳсулотлари сифати ва хавфсизлигига ўзлари кафолат берадиган тизимга ўтилмоқда» – Агентлик

900дан зиёд озиқ-овқат маҳсулотлари учун қайта сертификатлаш тизими тугатилади. Бундан ташқари, декларациялаш механизмини амалиётга қўллаш орқали корхоналар ўзлари ишлаб чиқарган бир қанча маҳсулотларининг сифати ва хавфсизлигига ўзлари кафолат беради.

Инвестиция ва ташқи савдо вазирлигида Техник жиҳатдан тартибга солиш агентлигининг тузилиши ва соҳада амалга оширилиши кутилаётган ўзгаришларга бағишланган матбуот анжумани ўтказилди.

Янги тузилган агентлик директори Дилшод Сатторовнинг таъкидлашича, бир қанча маҳсулотларга такрорий сертификатлаш талаблари бекор қилинмоқда.

«Бугунги кунгача мавжуд бўлган озиқ-овқат ва қишлоқ хўжалиги маҳсулотларига такрорий сертификатлашни талаб этадиган меъёр ва талабнинг бекор қилиниши 900дан зиёд озиқ-овқат маҳсулотлари учун қайта сертификатлашни тугатмоқда. Бундан кейин ушбу маҳсулотлар санитария-эпидемиология назоратидан ўтганидан кейин истеъмолга чиқиши кўзда тутилмоқда. Қолган лаборатория ёки идоралараро синов сертификатлаш тизимлари талаб этилмайди.

Ўтган 2020 йилда 157 мингта шундай сертификатлар тақдим қилинган бўлса, жорий йилда бу рақамлар 60 мингтагача камаяди.

Бундан ташқари декларациялаш механизмини қўллаш амалиётга татбиқ қилинмоқда. Олдинлари бу жараёнда фақатгина сертификациялаш тизими қўллаб келинган. Эндиликда корхоналар ўзлари ишлаб чиқарган маҳсулотларининг сифати ва хавфсизлигига ўзлари кафолат беради. Бу тадбиркорларга берилаётган қулайлик ва ишонч ҳисобланади. Шунингдек, учинчи томон ҳисобланган сертификациялаш идораларидан такрорий синовларни ўтказиш талаб этилмайди.

Бунинг натижасида сертификатлашадиган маҳсулотларнинг миқдори 540 тага камаяди. Бу тадбиркорлар томонидан қилинадиган сарф-харажатларнинг ҳам камайишига олиб келади», дея таъкидлади Дилшод Сатторов.

Аввалроқ, «Ўзстандарт» агентлиги тугатилиб, унинг функциялари Инвестициялар ва ташқи савдо вазирлиги ҳузуридаги янги Техник жиҳатдан тартибга солиш агентлигига ўтказилганлиги хабар қилинганди.