ҚҚДУга ўқишга киритиб қўйишни ваъда қилиб, 25 млн сўм билан ушланган шахс воқеаси юзасидан университет изоҳ берди

Бош прокуратура ҳузуридаги Департаментнинг Қораўзак туман бўлими томонидан ДХХ ходимлари билан ҳамкорликда тезкор тадбир ўтказилди. 

Унда Қорақалпоқ давлат университети ассистенти Р.Н. фуқаро Н.ни ушбу университетнинг Архитектура факультетига ўқишга киритиб қўйиш эвазига 25 млн сўмни фирибгарлик йўли билан олган вақтида ашёвий далиллар билан ушланган.

Ҳолат юзасидан Kun.uz мухбири университет маъмурияти билан боғланди. ҚҚДУнинг изоҳ беришича, қўлга олинган университет ассистенти эканлиги айтилган шахс ОТМда ярим штат ўриндошлик асосида муайян муддатда ишлаш учун шартнома тузган. 

Kun.uz'га берилган ҳужжатга кўра, унинг шартномаси 2020 йилнинг 17 декабридан 2021 йилнинг 30 июнь санасигача тузилган. Р.Н. нинг асосий иш жойи «Рубин» МЧЖ эканлиги маълум бўлди. ОТМ раҳбариятининг қўшимча қилишича, фирибгарлик жиноятини содир этганлиги гумон қилинаётган шахс ҳозирда озодликда қолмоқда.

Маълумот учун, мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
 
Эслатиб ўтамиз, бундан олдин НДПИ Элликқалъа филиалига ўқишга киритиб қўйиш эвазига 2 500 доллар олган фирибгар ушланганди.