ЖССТ коронавируснинг «дельта плюс» штамми кўчада ҳам юқиши мумкинлигидан огоҳлантирди

Жаҳон соғлиқни сақлаш ташкилоти коронавируснинг янги «дельта плюс» вариантини кўчада ҳам юқтириш мумкинлигидан огоҳлантирди. Бу ҳақда ЖССТ вакили Мелита Вуйнович маълум қилди.

«Ҳиндистондан олинган дастлабки маълумотларга кўра, касаллик юқиши учун бемор ёнидан ниқобсиз ўтиш етарли», – деди Вуйнович.

Унинг айтишича, мазкур штамм хавотир уйғотмоқда.

Аввалроқ ЖССТ катта илмий ходими Сумя Сваминатан коронавируснинг дельта-варианти бутун дунёни эгаллаётганини айтганди.

Маълумот берилишича, вируснинг ушбу тури 80дан ортиқ мамлакатда аниқланди ва тарқалиш жараёнида мутацияга учрашда давом этмоқда.