Финландияда Россиядан қайтиб келган 300 нафар футбол мухлисида коронавирус аниқланди

14 июндан кейин мамлакатда коронавирус юқтириш ҳолатлари билан боғлиқ вазият ёмонлашган. Аниқланган ҳолатларнинг 33 фоизи хорижга бориб келганларда қайд этилган.

Санкт-Петербургдаги Евро2020 ўйинларидан қайтиб келган футбол мухлисларининг 300 нафарида коронавирус аниқланди, деб хабар берди Yle нашри.

Қайд этилишича, Финландия ижтимоий таъминот ва соғлиқни сақлаш вазирлиги Россияга бормасликни тавсия қилган. Россиядан қайтиб келганларга эса коронавирусга тест топшириш айтилган.

Вазирликнинг билдиришича, 14 июндан кейин мамлакатда коронавирус юқтириш ҳолатлари билан боғлиқ вазият ёмонлашган. Аниқланган ҳолатларнинг 33 фоизи хорижга бориб келганларда қайд этилган. 16 июндан 23 июнгача 570 кишида коронавирус аниқланган.

Финландия миллий жамоаси Санкт-Петербургда Белгия (0:2) ва Россияга (0:1) қарши ўйин ўтказди.

Санкт-Петербургнинг ўзида эса 14 июндан буён коронавирус юқтириш ҳолатлари кунига ошмоқда. Охирги суткада шаҳарда 1335 кишида вирус аниқланган.

Тайёрлаган Дилшод Аскаров

#Финландия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.