Австралиялик 2004 йилги Олимпиада совриндори 25 йилга қамалди

Спортчининг акаси Дрю Баггали эса 28 йилга қамалган. Улар мамлакатга кокаин олиб киришга уринганликда айбланган.

Афинада бўлиб ўтган 2004 йилги Олимпиадада иккита кумуш медални қўлга киритган австралиялик байдаркачи Натан Баггали 2018 йилда мамлакатга 650 килограмм гиёҳвандлик моддасини олиб киришга урингани учун 25 йилга озодликдан маҳрум этилди.

7News телеканалининг хабар беришича, спортчининг акаси Дрю Баггали 28 йилга қамалган. У яна бир киши билан қайиқда кокаин ортилган кемадан гиёҳвандлик моддасини олган. Аммо уларни Австралия ҳарбий-денгиз кучларининг патрул кемаси таъқиб қилганидан сўнг улар кокаинли пакетларни сувга улоқтирган. Пакетларда 650 килограмм кокаин бўлган.

Тергов Натан Баггали ушбу жиноятга шерик бўлган деб топди.

Австралиялик спортчи 2005 йилда допинг қабул қилганлиги аниқланганидан сўнг спортни тарк этганди. Ўшандан буён у бир неча марта гиёҳванд моддалар билан боғлиқ ишларга аралашган. Жумладан, 2009 йилда акаси билан экстази ишлаб чиқариш ва сотишда айбланиб қамалган. 2015 йилда ҳам гиёҳванд моддалар савдосида айбланган.