Шавкат Мирзиёев бугун Олмалиққа боради

Президент Шавкат Мирзиёев бугун Олмалиққа боради. Бу ҳақда президент матбуот котиби Шерзод Асадов маълум қилди.

Фото: Президент матбуот хизмати (архив)

Қайд этилишича, давлат раҳбари кон-металлургия комбинати конлари негизида рангли ва қимматбаҳо металлар ишлаб чиқаришни кенгайтириш борасидаги ишлар билан танишади.

“Комбинатда мамлакатимиз кон саноатидаги яна бир йирик лойиҳа - «Ёшлик I» конини ўзлаштириш лойиҳаси амалга оширилмоқда”, дейилади президент матбуот котиби хабарида.

Маълум қилинишича, Шавкат Мирзиёев ушбу лойиҳа доирасидаги янги қувват - 3-мис бойитиш фабрикаси қурилишига тамал тоши қўяди.