«Давлат бошқа тилда, тадбиркор бошқа тилда гаплашмоқда». Экспортчилар уюшмаси раиси билан интервью

Иқтисодиёт ассамблеяси, Экспортчилар уюшмаси раиси Мухтор Умаров Kun.uz'га берган интервьюсида бугунги кунда ҳукумат ва тадбиркорлар ўртасида тўсиқ бўлаётган масалаларга тўхталди.

«Ҳозирги кеча-кундузда тадбиркорликка оид катта муаммоларимиздан бири — давлат органлари билан тадбиркорлар ҳамкорлиги йўлга қўйилмаганида. Кўпинча айнан тадбиркорлар учун қарорлар ишлаб чиқилади. Лекин тадбиркорларимиз бу қарорларни ишлаб чиқишда фаол эмас.

Аслида қарорлар тадбиркорларнинг талабларига асосан ишлаб чиқилиши керак. Бироқ уларда бундай тушунчанинг ўзи йўқ. Биз маълум бир қарорни чиқартиришимиз керак деб тўпланиб, маслаҳатлашиб, ҳуқуқшунослар ёллаб, қарор матнини тузиб, кейин бир таклиф билан ҳукуматга чиқиш амалиёти деярли йўқ бизда. Соддароқ айтсак, тадбиркорлар билан ҳукумат идоралари бир-бирларини яхши тушуна олмайди.

Ҳукумат идоралари вакиллари ишлар билан банд, уларнинг вазифалари кўп. Тадбиркорлар ҳам худди шунақа – ўз тижоратини қилиши зарур. Қонун ҳужжатлари тадбиркорликни ривожлантиришга ишлаши лозим. Қўпол қилиб айтсак, ҳозирда тадбиркорлар бошқа тилда, ҳукумат бошқа тилда гаплашади», дейди у.

Унинг сўзларига кўра, ҳукумат тижоратчи эмас, тадбиркорлар эса қонунчиликни яхши тушунмайди. Ўртада катта тушунмовчиликлар юзага келади.

Мухтор Умаров ҳукумат ва тадбиркорлар ҳамкорлигида қарор ишлаб чиқилганини ҳам маълум қилди.

«Иқтисодиёт ассамблеяси мебелчилик соҳасини ривожлантириш тўғрисида қарор қабул қилиниши бўйича Президент администрациясига мурожаат қилди. Ташаббусимиз қўллаб-қувватланди.

Биз қарорни қайсидир вазирликнинг мажлислар залида эмас, айнан мебел фабрикасида ўтириб ишлаб чиқсак деб илтимос қилдик. Март ойида орзумиз амалга ошди.

Мебелчилик фабрикасида барча мутасадди ташкилотлар раҳбарлари тадбиркорлар билан ўтириб, уларнинг нозик муаммоларигача ўрганиб чиқишди. Сўнгра қарор қабул қилинди. Яъни ҳужжат тадбиркорларимиз қўйган талаблар асосида ишлаб чиқилди. Ташаббусни қўлга олиб вазирликлар билан ҳамкорликни йўлга қўйиш вақти келди», дейди ассамблея раҳбари.

Таъкидланишича, вазирликлар тадбиркорларни эшитишлари керак. Чиқариладиган қарорлар уларнинг фойдасига ишлайдиган бўлиши лозим.

«Ҳозирда тадбиркорлардаги катта муаммо – жаҳон тажрибаси етишмаётганида, менежмент ва маркетинг тизимлари тўғри йўлга қўйилмаётгани, тадбиркорларга кадрлар ҳамда чет эл билан алоқа ва шартнома қилиш маданиятининг етишмаслиги бўлмоқда.

Бир муддат Америка Қўшма Штатларида яшаб, ишлаганман. У ерда давлат деган нарсани деярли кўрмайсиз. Солиқ ва божхона қўмитаси йўқ. Иқтисодиёт тадбиркорларнинг қўлида, улар давлатни ривожлантиради.

Иқтисодиётни вазирлик ривожлантирмайди, у фақат йўл-йўриқ кўрсатиб, тадбиркор олдидаги тўсиқларни олиб ташлайди. Вазирлик тижоратчи ёки тадбиркор эмас.

Статистикага кўра, бугунги кунда иқтисодиётда кичик ва ўрта бизнеснинг улуши 50 фоиз. Яъни иқтисодиётдаги тадбиркорларнинг роли 50 фоизни ташкил қилмоқда. Америкада қанча десангиз, у ерда 92 фоиз. Ривожланган давлатларда бюджетнинг асосий тўлдирувчиси бу кичик ва ўрта бизнес ҳисобланади», деди уюшма раиси.