“2 йилда 7та давлатга экспортни йўлга қўйдик” — Андижондаги DINAR GROUP корхонасига саёҳат

3,5 гектарлик майдонда жойлашган лойиҳа қиймати 10 миллион АҚШ долларига тенг. Корхона йилига 3,5 миллион дона тайёр трикотаж маҳсулотлари ишлаб чиқаради.

Корхона ижрочи директори Сардорбек Азизов бизни корхонадаги мавжуд иш жараёнлари – мато тўқиш, бўяш ва гул босилиб тайёр маҳсулот ҳолатига келиши қай ҳолатда бажарилиши билан таништирди.

Аввалига корхонанинг мато тўқиш фабрикасида бўлдик. Бу ерда ўрнатилган замонавий дастгоҳларда 200 нафар ишчи фаолият юритади. Бизга берилган маълумотга кўра, фабрикада кунига 20 турдан зиёд 18 тонна мато тўқилади.

Маҳобатли бўёқ цехидамиз. Хитой ва Италияда ишлаб чиқарилган замонавий ускуналарни бошқараётган ёшлар масъулиятли иш билан банд. Цех ишчилари сони 300 нафар. Улар кунига 40 тонна матога бўёқ беришади.

Текстил ишлаб чиқаришнинг энг олтин қоидаларидан бир бу – тозалик. Цехдаги қизғин иш жараёнида тозаликка алоҳида эътибор қаратилиши диққатга сазовор.

Полни доим махсус суюқлик билан артиб-ювиб бориш ҳам техника ёрдамида бажарилади. Ўзимиз ҳам қизиқиб мана шу агрегатни бошқариб кўрдик.

Лаборатория эса алоҳида мавзу. Матога ранг танлаш ускунаси берилган буйруққа асосан автоматик тарзда танланган рангни тайёрлаб беради.

Корхонанинг энг кўп ходим ишлайдиган бўлими бу – тикув цехи. Маҳсулотни тайёр ҳолга келтирувчи цехда 700 нафар аёллар фаолият юритади.

Бу ерда кунига 6 минг дона аёллар тайёр кийимлари ишлаб чиқарилмоқда. Цех ёруғ ва шинамлиги эътиборни тортади.

Биз тайёр маҳсулотлар кўргазма залидамиз. Корхонанинг тайёр ва ярим тайёр маҳсулотлари сифати билан ажралиб туради.

DINAR GROUP нафақат сифатли маҳсулот етказиб бериш, балки аҳолини иш билан таъминлашни ҳам мақсад қилган.

“Бизни қувонтиргани, муҳтарам президентимиз Шавкат Мирзиёев Андижон вилоятига бу йилги ташрифи давомида корхонамизда бўлди. Президентмиз иш жараёни ва тайёр маҳсулотларни кўздан кечирди ва корхонамизни янада ривожлантириш бўйича ўз кўрсатмаларини берди”, – дейди Сардорбек Азизов.

Бир ярим минг нафар ишчи-ходим фаолият юритаётган “DINAR GROUP” МЧЖ янги-янги лойиҳалар устида иш олиб бормоқда.

Элмурод Эрматов тайёрлади.

Тасвирчи ва монтаж устаси – Азизбек Исмоилов