Тадбиркорлар бизнес кўрсаткичларининг пасайишини кенгайтирилган карантин чекловлари билан боғлашмоқда

Иқтисодий тадқиқотлар ва ислоҳотлар маркази (СERR) жорий йилнинг июль ойида ўз бизнесининг ривожлантириш истиқболларини қандай баҳолашларини билиш учун республика бўйлаб 1000 дан ортиқ корхоналар билан суҳбат ўтказди. Бу ҳақда марказ ахборот хизмати маълумот бермоқда.

Июль ойида ишбилармонлик муҳитининг умумий кўрсаткичи ўтган ойга нисбатан 3 пунктга камайган ва 55 пунктда (-100 дан +100 гача бўлган шкала бўйича) мамлакатдаги ишбилармонлик муҳити ижобий деб баҳоланган.

Ишбилармонлик муҳити кўрсаткичининг динамикаси

Ишбилармонлик муҳити кўрсаткичларининг пасайиши республикадаги ноқулай эпидемиологик вазият билан изоҳланади. Хусусан, кичик ва ўрта бизнес вакилларининг 17 фоизи пандемиянинг товар/хизматларга бўлган талабга салбий таъсирини қайд этган.

Бизнеснинг ҳозирги ҳолати кўрсаткичининг пасайиши саноат, қишлоқ хўжалиги ва хизмат кўрсатиш соҳасидаги тадбиркорлар ўртасидаги кайфиятнинг ўзгариши билан, бу эса асосан кенгайтирилган карантин чекловлари билан боғлиқ.

Шу билан бирга, қурилиш соҳасида бизнеснинг ҳозирги ҳолати сезиларли даражада яхшиланмоқда.

Кўриб чиқилаётган яна бир кўрсаткич, бизнесни ривожлантириш истиқболларини кутиш кўрсаткичи бир поғонага камайиб, 72 пунктни ташкил этди, бу эса ўз навбатида тадбиркорларнинг кейинги 3 ой давомида ўз бизнесини ривожлантириш истиқболлари ҳақидаги умидларини оптимистик тарзда акс эттиради.