Ўзини президент администрацияси ходими деб таништирган шахс мансабдор аёлни 20 минг долларга чув туширди

Телефон орқали ўзини президент администрациясининг Москва шаҳридаги ваколатхонаси ходими сифатида таништирган шахс камида 20 кишини алдаб, улардан катта миқдордаги маблағларни олиб қўйган.

Ўзини Темур Суннатович Алимов деб атаган фирибгарнинг асосий қурбони –яна ҳам юқори лавозимга кўтарилишга интилаётган мансабдор аёл бўлган. Сохта ходим ушбу аёлга қўнғироқ қилиб, у янада юқори лавозимга тасдиқланганини айтган.

«Сизнинг номзодингиз юқори лавозимга тасдиқланган. Зудлик билан президент администрациясининг Москвадаги масъул вакили Қаюмова Малика Камаловна билан боғланинг. Ҳозирча бу ҳақда бошлиғингизга ва бошқаларга гапирманг, буйруқ чиққунича сабр қилинг», деган у.

Маълумот учун, Президент администрацияси Москва шаҳрида ваколатхонаси ҳам, масъул вакиллари ҳам йўқ.

Мансабдор аёл телеграм мессенжери орқали «Малика Қаюмова»га қўнғироқ қилади. Кейинги телефон суҳбатида «администрация вакили» душанба куни фармонга қўл қўйилишини айтади. Шунингдек, аёлдан «узата олиши мумкин бўлган яшил қоғозлар»нинг максимал миқдорини айтиши сўралади. Мансабдор аёл эса кўпи билан 20та [20 минг АҚШ доллари] бера олишини айтади.

Шундан сўнг, администрациянинг сохта вакили Москвада эканлигини айтиб, уйга совғалар олиш учун ўша пулларни банк ҳисоб рақами орқали бериб юборишни сўрайди. Мансабдор аёл эса «Темур Алимов» билан телефонда гаплашиш асносида банкка 20 минг долларни олиб бориб, Россияга жўнатиб юборади.

ИИВ томонидан ўтказилган тергов жараёнларида аниқланишича, ушбу фирибгар Россия Федерацияси ҳудудида бўлиб турган ҳолда 14 хил сим-картадан фойдаланган ва Ўзбекистоннинг 20 нафар фуқаросини тузоққа илинтирган. Жабрланганлардан 58 минг долларни онлайн равишда ундирган.

ИИВ тергов департаменти ушбу фирибгардан жабрланган фуқаролар +99871 231-46-26 рақами орқали мурожаат қилиши мумкинлигини маълум қилди.

Маълумот учун, Ўзбекистон Республикаси Жиноят Кодексининг 211-моддасига кўра пора бериш, яъни мансабдор шахсга мазкур мансабдор шахснинг ўз хизмат мавқейидан фойдаланган ҳолда содир этиши мумкин бўлган муайян ҳаракатни пора берган шахснинг манфаатларини кўзлаб бажариши эвазига қонунга хилоф эканлигини била туриб бевосита ёки воситачи орқали моддий қимматликлар бериш ёки уни мулкий манфаатдор этиш жиноий қилмиш дея баҳоланади.