Швецияда 12-15 ёшли ўсмирларни коронавирусга қарши эмлашга рухсат берилди

Швеция бош вазири Стефан Лёвен мамлакатдаги 12-15 ёшли ўсмирларни коронавирусга қарши эмлаш бошланишини эълон қилди. 

“Бу касалликнинг оғир кечиши ва мактабдан қолиб кетишингизнинг олдини олади”, – деди у.

Маълумотларга кўра, Швецияда 16 ёшдан катта аҳолининг 80 фоизи вакцинанинг бир дозасини, қарийб 75 фоизи эса ҳар икки дозасини олган.

Европа регулятори 12 ёшдан катта ўсмирларни Pfizer/Biontech ва Moderna компаниялари вакциналари билан эмлашга рухсат берган. Аввалроқ Франция, Германия, Испания, Италия ва Португалияда ўсмирларни коронавирусга қарши эмлашга рухсат этилганди.

Worldometers сайти маълумотларига кўра, Швецияда коронавирус юқтириш билан боғлиқ 1,1 млндан ортиқ ҳолат қайд этилган, 14,7 мингдан зиёд бемор вафот этган.